11 мая 2011 г.
Вăрçă вĕçленнĕренпе 66 çул çитрĕ. Шел, хаяр вăрçă вут-çулăмĕ витĕр тухнисем, тылра ырми-канми ĕçленисем сахаллансах юлчĕç.
Аслă Çĕнтерÿ уявне Ураскилт салинче те паллă турĕç. Çĕнтерÿ салтакĕсем вара митингра çукчĕ. Çавах та уяв пысăк шайра иртрĕ. Ураскилт ял тăрăхĕн пуçлăхĕ Э. Козлов пурне те Çĕнтерÿ кунĕ ячĕпе саламларĕ. Ветерансене аса илсе ăшă сăмахсем каларĕ. Райпо ертÿçи Ю.Харитонов пухăннисем умĕнче вăрçă тискерлĕхĕн асаплăхĕ тата совет халăхĕн паттăрлăхĕ çинче чарăнса тăчĕ. Шупашкарти Калинин районĕнчи ДОСААФ организацийĕн Элĕкри уйрăмĕн ертÿçи В.Казаков, Ураскилт шкул директорĕ В.Миронов салам сăмахĕсем каларĕç.
Ураскилт шкулĕнче вĕренекенсем сăвăсем вуларĕç, вăрçă темипе çыхăннă юрăсем юрларĕç. Район депутачĕ Ю. Харитонов хăйĕн ячĕпе палăк умне чечек кăшăлĕ хучĕ. Ураскилт ял администрацийĕпе шкул ачисем те вăрçăра пуç хунисене хисеп турĕç.