11 мая 2011 г.
Чир-чĕре палăртма анализ кирлех çав. Çавăнпа та врач кабинетĕнче пулнă хыççăн тÿрех лабороторине кайма тивет.
Районти тĕп больница лабораторийĕнче вара пĕр вăхăт çынсем йышлă. Анчах нумайлăхах мар, ирхи саккăртан пуçласа вуннăччен кăна. Чирлисене кăна-и, медицина тĕрĕслевне, диспансеризацие пынисен юнне те тĕрĕслеççĕ, ытти анализсем те тăваççĕ лаборантсем.
Кунти ĕçченсем йышлах мар. Юлашки тапхăрта баклабораторипе пĕр ушкăнра вĕсем. Коллектива чылайранпа Надежда Спиридонова врач ертсе пырать. Унсăр пуçне çичĕ лаборантка тата икĕ санитарка хăйсен ĕçне пĕлсе пурнăçлаççĕ. Баклаборатори ĕçне Валерий Товарищев йĕркелесе пырать.
Лабораторире чылай чухне 100 çын таранах пулать. Кашнин анализне хăвăрт та тĕп-тĕрĕс палăртас тесе кулленех хĕрÿ ĕçре кунти ĕçченсем. Кăнтăрлаччен аппаратсем умĕнчен уйрăлмаççĕ. Ĕçри кăткăслăха, вăрттăнлăха тахçанах алла илнĕ вĕсем. Нумай тĕрлĕ анализ тăвасси çăмăл мар, яваплă та. Юнăнне кăна, сăмахран, нумай енлĕ тишкерÿ тăваççĕ.
– Пĕрин ĕçне кашни пĕлсе тăни, пĕр-пĕрне пулăшни анализсене хăвăртрах хатĕрлесе çитерме май парать, – терĕ лабораторире вăтăр çула яхăн вăй хуракан Валентина Иванова.
Вăл чылайранпа аслă лаборантка тивĕçне тÿрĕ кăмăлпа пурнăçлать. Ыттисем пирки те çавнах каламалла. Алина Алексеева, Ирина Иванова, Галина Степанова, Любовь Гордеева, Людмила Андреева, Альбина Майорова хăйсен ĕçĕнче чăн ăстасемех.
В. Иванова аслă лаборантка хăш-пĕр ыйтусем çине те хаваспах хуравларĕ. Сирĕн тĕп тĕллев анализсене çийĕнчех хатĕрлесси пулĕ тесен вăл çапла каларĕ:
– Кунта паянхи ĕçе ырана хăвараймăн. Анализсем кивелме те пултараççĕ. Çавăнпа та йывăр чирлисенне малтанах тĕрĕслетпĕр.
– Мĕнпур анализсене вырăнтах тума пултаратăр-и;
– Паллах, пĕтĕмпех тесен те тĕрĕсех. Çĕнĕ аппаратсемпе ĕçлеме пуçларăмăр. Вĕсем анализсенчи элементсене лайăхрах тишкерме пулăшаççĕ.
Хамăр пĕлĕве ÿстерсе пымасăр та май çук, тăтăшах курссенче пулатпăр.
– Малтанхипе хальхи ĕçре мĕнле уйрăмлăхсем пур;
– Ĕçри условисем лайăхланса пынă май, анализсене пур енлĕ тишкерсе палăртма пуçларăмăр. Анчах чирлисен хисепĕ чаксах пырать теме çук. Çавна май пирĕн ĕç те нумай.
Лаборантсем кулленех уйрăмсенчи чирлисем патĕнче те пулаççĕ.
Г.СВЕТЛОВА.