11 мая 2011 г.
Çиччĕмĕш класра çеç вĕренет-ха Таня Иванова. Шкулта пур предметпа та ĕлкĕрсе пырать. Дневникĕнче «4» тата «5» паллăсем кăна унăн. Карачура шкулĕнчи лайăх вĕренекенсенчен пĕри вăл. Шкулта та, районта та лайăх кăтартусемпе палăрать. Пултарулăхĕ те тĕрлĕ енлĕ. Хаваспах районти тата республикăри мероприятисене хутшăнать. Сăвă-калав çырас туртăм та пур вун виççĕри хĕр ачан.
– Шупашкарта Я.Ухсай ячĕпе конкурс йĕркеленĕччĕ. Эпĕ унта хам çырнă сăвăсене ярса патăм,– вăтаннă пек пулчĕ Таня.
Çиччĕмĕш класра вĕренекенскер сăвă-калава чăвашла та, вырăсла та çырма тăрăшать. Ку ĕçре ăна вырăс тата чăваш чĕлхин вĕрентекенĕсем хавхалантараççĕ. Анчах темшĕн-çке сăвă-калава çамрăк хаçат-журнала ярса пама именет. Çапах та шкулта кăларакан стена хаçачĕсенче унăн хайлавĕсем кирек хăçан та вырăн тупаççĕ.
Таня Иванова шкулта биологи, физика, вырăс чĕлхи предмечĕсене кăмăлласах вĕренет. Çиччĕмĕш класа лайăх паллăсемпе вĕренсе пĕтерсен Шупашкарти Г.Лебедев ячĕллĕ лицея каясшăн, унтан вĕренсе тухсан дизайнер пуласшăн.
Т.Иванова вĕренÿре те, обществăлла мероприятисенче те активлăхпа палăрать. Юрлас-ташлас енĕпе те пултаруллă. Сасси уçă, илемлĕ унăн. Уйрăмах чăваш юррисене кăмăллать. Шкулти пур мероприятисене те хутшăнать. Хăйĕн хитре сассипе пурне те тыткăнлать. Концертсенче, тĕрлĕ уявсенче ăна яланах ертсе пыма шанаççĕ. Уяв программисене хатĕрленĕ чухне те пултарулăхĕпе, тавçăрулăхĕпе палăрма тăрăшать вун виççĕри хĕр ача. Шкулти агитбригадăпа районти конкурссене çитме те вăхăт тупать Таня. Тус-юлташĕсем те нумай хĕр ачан. Уйрăмах Эвелина Ефремовăпа туслă пулнине пĕлтерчĕ. Вăл та, Таня пекех, юрра-ташша маçтăр.
Т.Иванова Мăн Кăканарта пурăнать. Ашшĕ, Валерий Петрович, электрик профессине алла илнĕскер, ялта ĕç çукран Мускава ĕçлеме çÿрет. Амăшĕ Светлана Львовна Мăн Карачура ялĕнчи культура çурчĕн директорĕ шутланать. Вăл кунта чылай çул тăрăшать. Халăха тĕрлĕ мероприятисемпе савăнтарать. Ахăртнех, унăн пултарулăхĕ хĕрне куçнă. Светлана Львовна Таньăна та час-часах сцена çине кăларать, тĕрлĕ юрă-ташă вĕрентет.
Вера МОРОЗОВА.