18 мая 2011 г.
Уй-хирти мĕн пур ĕçсене алă вăйĕпе пурнăçлаттăмăр. Йышлăн вăй хураттăмăр. Эпир, ачасем те, аякра тăрса юлман. Хĕвел тухичченех тырă вырма тухнă. Эпĕ вун иккĕре кăна пулнă. Мария Коннова тата Галя йăмăкăм пĕрле çÿреттĕмĕр. Пĕррехинче ана çине çитрĕмĕр те пирĕн пĕчĕк Галя курăнмарĕ. Вăл, хыçалта пыраканскер, уйрах çывăрса юлнă иккен.
Пĕрлехи ĕçе кĕçех виçсĕмĕр те кÿлĕнтĕмĕр. Пуç çĕклемесĕр тырă выратпăр, кĕлте хыççăн кĕлте çыхатпăр. Çапла тимлесе кăнтăрла çитнине те сиссе юлаймарăмăр. «Анфиса, киле кайса салма яшки пĕçерсе кил», – хушрĕç мана çамрăк ĕçченсем. Хам вара салма мĕнне лайăххăн пĕлмен те. Çапах та вĕсен ыйтăвне тивĕçтертĕм. Анчах чусти ирĕлсе кайнипе салма мар, нимĕр пулнă манăн. Çапах хырăмĕсем выçнăскерсем ăна юратсах çирĕç.
Пăтă мĕнле пĕçерсе уя илсе тухнине те манаймастăп. Ку апата, кĕрпине нумай янăран, пĕр витре таранах хатĕрленĕччĕ. Çапла икĕ кун çирĕмĕр тулă пăттине.
Колхозра ĕçĕ питĕ нумайччĕ, анчах та çимелли çукчĕ. Апла пулин те кар тăрса ĕçленĕ, савăннă та эпир. Кăнтăрлахи вăхăтра вăй хунипех лăпланман-ха. Бригадир каçхине сеяльщика тухма чĕнетчĕ. Тырра икĕ сеялкăпа акаттăмăр. Эпир пĕр сеялкине йышăнаттăмăр, теприн çинче Ульяна Морозовăпа Фаина Александрова тимлетчĕç. Механизаторĕ Виталий Красновчĕ. Хуçалăха çамрăк агроном Полина Прокопьева килсен чунтанах савăнтăмăр. Вăл пире пулăшатчĕ, хавхалантаратчĕ те.
Çывăрма та вăхăчĕ тивĕçмен. Ульяна сеялка ещĕкне кĕрсе выртсах тĕлĕрнĕччĕ. Юрать-ха ăна вăхăтра асăрхарăмăр.
Пурте тăрăшса ĕçленĕрен уй-хирте, йĕтемсем çинче ĕç вĕресе тăратчĕ. Вăхăтра ĕлкĕрсе пынă, уйра тырă-пулă хăварман.
Анфиса ФЕДОРОВА,
ĕç ветеранĕ.