21 мая 2011 г.
Тĕрлĕ ыйтусене сÿтсе явнă районта иртнĕ черетлĕ информаци кунĕнче. ЧР Патшалăх Канашĕн Председателĕн çумĕпе Владимир Мидуковпа район администрацийĕн пуçлăхĕ Леонид Читнаев Крымсарайкка ял тăрăхĕнче пулнă. Малтанах вĕсем «Чăваш Ен ял хуçалăх продукцийĕ» обществăра уй-хир ĕçĕсем мĕнле пынипе паллашнă. Хальхи вăхăтра кунта купăста лартаççĕ.
Ун хыççăн информаци ушкăнĕ ял çыннисемпе тĕл пулса калаçнă, ыйтусене хуравланă. Çуллахи каникул кунĕсем пуçланаççĕ те, ачасемпе çамрăксене ĕçпе тивĕçтерес, кану йĕркелес ыйтусем çивĕч тухса тăраççĕ. Кун пирки В.Мидуков çапла пĕлтернĕ: каникулта ачасен канăвне лайăх йĕркелесси, лагерьсенче пурăнма меллĕ меслетсем туса парасси пĕтĕмпех район администрацийĕсен тивĕçĕ пулса тăрать. Ку тĕлĕшпе хальхи вăхăтра пур районсемпе хуласенче те комиссисем туса хунă. Республика бюджечĕн районсене сахал мар укçа-тенкĕ уйăрнă.
Республикăра «Вăрман кунĕ» акци пырать. Çавна май Владимир Петрович пурне те тавралăха тирпей-илем кĕртес ĕçе хутшăнма, субботниксем ирттерме, çакăнта шкул ачисемпе çамрăксене явăçтарма чĕнсе каланă.
Ялсенче, вăрмансенче пушар тухас хăрушлăх та пулма пултарать. Çакăн пек инкек-синкекрен асăрханасси пирки те чарăнса тăнă В.Мидуков.
Район администрацийĕн пуçлăхĕ Л.Читнаев çурхи уй-хир ĕçĕсем мĕнле пыни çинчен тĕплĕн каласа панă, социаллă пурнăçпа экономика аталанăвĕн малашлăхĕпе паллаштарнă, тĕл пулăва пухăннисен ыйтăвĕсене хуравланă.