25 мая 2011 г.
Нумаях пулмасть РФ Финанс министерстви эрех-сăра хакне тăватă хут ÿстерме йышăннăччĕ, анчах та Владимир Путин премьер-министр çакна критикленĕ. Çавна май хаксем икĕ хут кăна ÿсĕç.
Çур литр эрех 98 тенкĕрен 420 тенке çитессе нумайăшĕ хăраса кĕтнĕ. Премьер тÿрлетĕвĕ хыççăн кĕленчен чи пĕчĕк хакĕ 180 тенкĕрен иртмĕ. Ахăртнех премьер-министр çитес суйлав кампанине хатĕрленет, çавăнпа хаксене тăруках ÿстерсе ярассине чарнă. Анчах та экспертсен шучĕпе çакă вăхăтлăха кăна, кайран хаксем пур пĕрех темиçе хут ÿсĕç. 2012 çулхи июлĕн 1-мĕшĕнчен çур литр шурри 210 тенке çитмелле. Тата тепĕр икĕ çултан çакăншăнах сахалтан та 400 тенкĕ тÿлеме тивĕ.
Владимир Путин алкоголь хакне тăруках ÿстернипе эрех ĕçме чарма май çуккине те палăртнă. Пачах урăхла, аншарли юхтарассипе суррогат ĕçесси самай ÿсме пултарать.
Сăра хакĕ те ÿсмелле. 2013 çултан сăрана пластик савăтпа сутассине чараççĕ. Хальхи вăхăтра Раççейре сăран 48 процентне шăпах йÿнĕ пластик савăтпа сутаççĕ. Пластик вырăнне кантăк кĕленчепе усă курма пуçласан хаксем самантрах ÿсесси куç кĕрет.
2010 çулта Раççейре 10 млрд литр сăра ĕçнĕ, кашни çын пуçне 71 литр. Патшалăх Думи ларексемпе киосксенче, палаткăсенче, алăран, автомобильсенчен пилĕк процентран хаяртарах сăра сутма чармалли пирки саккун кăларнă пулин те халăх сăра ĕçме пăрахни курăнмасть-ха.
98 тенкĕ хальхи вăхăтра чи йÿнĕ çур литр шурă эрех хакĕ.
400 тенкĕ тÿлеме тивĕ (тÿрлетÿсем пулмасан) пĕр кĕленче эрехшĕн 2014 çулта. 180 тенкĕ тÿлĕпĕр çавăн чухлĕ эрехшĕнех (тÿрлетÿсем кĕртсен).