25 мая 2011 г.
Ял халăхне пĕр çĕре пухаканĕ – культура çурчĕ. Кунта «вучах» сÿнсен – юрă-ташă та пĕтĕ. Çакна карачурасем аванах ăнланаççĕ.
Çыннисем те пултаруллă ку ялта, культура ĕçченĕсем те халăхпа ĕçлеме пĕлеççĕ. Каçсерен чылайăн пухăнаççĕ икĕ хутлă кирпĕч çурта. Репетицисем те час-часах иртеççĕ Карачура клубĕнче. Шкулта вĕренекен те, ял хуçалăх ĕçченĕ те, ватăсем те хутшăнаççĕ клубри мероприятисене. Кашни репетицинех çитме тăрăшаççĕ вĕсем. Сăмахран, Карачура шкулĕпе тачă çыхăнура ĕçлет культура çурчĕ. Вĕрентекенсемпе пĕрлех шкул ачисем те тĕрлĕ концертсенче хăйсен пултарулăхĕпе тĕлĕнтереççĕ. Ачасем ытларах шÿтлĕ сценкăсенче, кулăшсенче хăйсене кăтартаççĕ. Юлашки вăхăтра вĕренекенсем те спектакльсенче хутшăнма пуçларĕç. Клуб директорĕ Светлана Иванова шăпах кунти ĕç-хĕле йĕркелесе, тытса пырать. Вăл культура ĕçĕ-хĕлĕнче тахçантанпах ĕçлет. С.Иванова ĕçленĕ тапхăрта ял çыннисем умне миçе концерт, спектакль кăларман-ши; Районти пĕр мероприятирен те юлман карачурасем. Пĕчченех нимĕнле мероприяти те пулаймĕ паллах. Çамрăксем каланă тăрăх, клуб директорĕ культура çуртне кашни кунах уçать, алăкĕсем нихăçан та хупă тăмаççĕ. Уйрăмах канмалли кунсенче клубра халăх йышлă. Çамрăксем вăхăта савăнăçлă та хаваслă ирттереççĕ. Ют ялсенчен те пухăнаççĕ яшсемпе хĕрсем.
Палăртнă кун йĕркипе килĕшÿллĕ ĕçлет С.Иванова. Пĕр уява та паллă тумасăр хăвармасть. Ĕçленине планласа пырать, тепĕр уйăхра ирттермелли мероприятисене малтанах шутлать, ăна хут çине куçарать. Культура çуртне тирпейлĕ тытать Светлана Львовна. Ку ĕçре Ефремова техслужащи яланах пулăшса пырать. Вĕсен хĕрĕсем те юрра-ташша маттур. Культура çуртĕнче иртекен мероприятисене час-часах хутшăнаççĕ. С.Ивановăн Таня хĕрĕ вара концерт программине ертсе пырать.
Культура вучахне сÿнтересшĕн мар-ха карачурасем. Çавăнпа та ырми-канми тăрăшаççĕ.
М.ПЕТРОВА.