25 мая 2011 г.
Чăваш Сурăмĕнчи вăтам шкулта тăваттăмĕш класс пирки ырăпа асăнаççĕ. «Лайăх вĕренеççĕ, туслă пурăнаççĕ, обществăлла ĕçре хастар, юрă-ташăра та пултаруллă», – çирĕплетсе каларĕ шкул директорĕ Надежда Кирилловна Давыдова та.
– Тăваттăмĕшсем – вун улттăн: вун икĕ хĕр ача тата тăватă арçын ача. Хĕр ачасем ытларах пулнăран та класс тăрăшуллă, ĕçчен, туслă тесе шутлатăп. Йышра отличниксем иккĕн, ударниксем вуннăн, – пĕлтерчĕ хăй класĕ пирки Раиса Соловьева.
Вăл ачасем олимпиадăсене, конкурссене хутшăнса çĕнсе илнĕ дипломсемпе хисеп грамотисене умне кăларса хучĕ.
Оля Егорова отличница, авă, пĕлтĕр «Мир дикой природы» районти конкурсра пĕрремĕш вырăна тухнă. Вăл кăçал вырăс чĕлхипе иртнĕ район шайĕнчи олимпиадăра та çĕнтерÿçĕ пулса тăнă. Тăрăшуллă хĕр ача Чăваш патшалăх университетĕнче чăвашла сăвăсене илемлĕ вулассипе пулнă конкурса та хутшăннă, сертификат илнĕ. Пиллĕк паллăсемпе вĕренекенскер, патриотизмла юрăсен конкурсĕнче иккĕмĕш вырăна тухнă.
Мая Андреева отличница та – чылай конкурссен çĕнтерÿçи.
Ку класс ачисем шкулти пуканесен театрне те çÿреççĕ. Ирина Тихонова, Ирина Арсентьева, Илья Игнатьев активлăхпа палăраççĕ. Тăваттăмĕшсем пĕлтĕр Пĕтĕм Раççейри перепиçе халалласа ирттернĕ конкурсра та палăрнă, районта виççĕмĕш вырăна тухнă.
Класс ÿсĕмĕ унăн ертÿçинчен те нумай килет. Р.Соловьева 1994 çултанпа – Чăваш Сурăмĕнче. Вăл ачасемпе ĕçленĕ вăхăтрах пĕлĕвне Шупашкарти педагогика институтĕнче ÿстернĕ.
Унăн ачисем те пултаруллă. Асли, Ольга, вуннăмĕш класра лайăх вĕренет. Хĕр ача пур енĕпе те активлă. Шкулти КВН-сене, ытти мероприятисене те ертсе пырать. Иван, аппăшĕ пек мар, лăпкă ача. Унăн дневникĕнче те «тăваттă» тата «пиллĕк» паллăсем кăна.
Е.САВЕЛЬЕВА.