28 мая 2011 г.
Тавăт ял тăрăхĕн администрацийĕн йышне çĕнĕ специалист хушăннă. Ку Олеся Олеговна Федорова.
Пĕлĕвне аслă шкулта ÿстерет
Компьютера итлеттерме пĕлет çамрăк. Унпа тĕрлĕ операцисем тăвать. Çынсем, сăмахран, ял тăрăхне тĕрлĕрен справкăсем илме пырсах тăраççĕ. Олеся вĕсене кăмăллăн йышăнать, ĕç хучĕпе те часах тивĕçтерет. Интернет тĕнчипе те хăвăртах туслашнă вăл. Ял тăрăхĕн пурнăçĕн ĕç-хĕлне сайта кĕртсе пырать. Электронлă почтăпа усă курса, информацие тĕрлĕ çĕре çитерессипе те тимлет Олеся Федорова. Компьютера хăвăртрах алла илме ăна аслă шкулта вĕренни те пулăшать. Çамрăк специалист ĕçленĕ вăхăтрах Атăл-Вятка академийĕн Шупашкарти филиалĕнче пĕлĕвне ÿстерет.
Олеся Тавăт ялĕн каччипех Алексей Федоровпа пĕрлешнĕ. Мăшăрĕ те – студент, Чăваш ял хуçалăх академийĕнче куçăмсăр майпа агронома вĕренет. Хăй хуларах водительте ĕçлет.
– Хальлĕхе пĕри ялта, тепри хулара пурăнатпăр-ха. Мăшăрăм вĕренсе пĕтерсен юнашарах пулăпăр, – терĕ çамрăк хĕрарăм.
Яшсемпе хĕрсем
тунсăхламаççĕ
Вăл ял тăрăхĕнчи çамрăксем енĕпе те ĕçлет. Çавна май яшсемпе хĕрсен пурнăçĕпе интересленсех тăрать, пуçарулăхпа çаврăнăçулăх та кăтартать.
– Пирĕн тăрăхри ялсенче вун тăваттăри – вăтăр пĕр çулсенчи çамрăксем 604-ăн шутланаççĕ. Çав пысăк йышра пĕрисем вĕренеççĕ, теприсем ĕçлеççĕ. Ĕçне-хĕлне ял пурнăçĕпе çыхăнтарнисем те пур, – каласа пачĕ Олеся Олеговна.
Чи пултаруллисене ятранах асăнчĕ. Сергей Егоров фермер, сăмахран, çĕр ĕçне çĕнĕлле йĕркелесе янă. Тĕрлĕ ял хуçалăх культурисем туса илессипе вăй хурать. Выльăх-чĕрлĕх ĕрчетессипе те тимлет. Сурăхсем туяннă. Унăн ырă тĕслĕхĕпе хавхаланса, çĕр çинче ĕçлесе, выльăхсем усраса тупăш илессишĕн тăрăшакан çамрăк çемьесем татах та пур.
Ял тăрăхĕнче спорта аталантарассишĕн тăрăшни яруççăн палăрать. Хĕллехи вăхăтра каток площадкинчен шкул ачисем, ытти çамрăксем татăлма та пĕлмен. Кунта республика пĕлтерĕшлĕ ăмăртусем те иртнĕ. Ку тăрăхри çамрăксем волейболла, футболла та выляма юратаççĕ. Артем Егоров, Владимир Лаврентьев, Александр Кузьмин, Александр Игнатьев спортра уйрăмах хастар.
– Районти культура ĕçченĕсем хушшинче «Родной край благославленный»ятпа иртнĕ смотр-конкурсра пĕрремĕш вырăна тухма пултартăмăр, – хыпарларĕ Олеся Олеговна.
Ку мероприятире вăтăр сакăр çынран тăракан хор юрăсем шăрантарни ял-йыша уйрăмах килĕшнĕ. Фольклор ушкăнĕсемпе, уйрăммăн юрлакансемпе те палăрнă Тавăт ен çамрăкĕсем. Ташлама та юратаççĕ вĕсем. Анжелика Железнова, сăмахран, «Чиперкке ентешсем» илемлĕх конкурсне хутшăннă, куракансене араб ташшипе тĕлĕнтернĕ. Вăл «Пуринчен те тавçăрулли» номинацире çĕнтернĕ.
Тăван тавралăха тирпей-илем кÿрессипе те активлă кунти çамрăксем. Аслă Çĕнтерĕве халалласа лартнă палăка çĕнетнĕ çĕрте хастарлăхпа палăрнă.
Елена ТИМОФЕЕВА,