28 мая 2011 г.
Эдуард Павлович Иванов Хирлеппуç ялĕнче 1941 çулхи октябрĕн 1-мĕшĕнче çуралнă. Вăл ялти çичĕ çул вĕренмелли шкултан 1955, Элĕкри вăтам шкултан 1958 çулсенче вĕренсе тухнă. Хыççăн пĕлĕвне Хусанти патшалăх университечĕн физика факультечĕн астрономи уйрăмĕнче «пĕлĕтри механика» (небесная механика) специальноçа вĕренсе ÿстерет. Королев хулинчи наукăпа тĕпчев институтĕнче инженерта, наукăн аслă сотрудникĕнче ĕçленĕ. Космонавтика енĕпе вара вăтăр çул ытла вăй хунă. Унăн тĕпчевĕсен тĕп тематики – Уйăх, Марс, Венера тата ытти Хĕвел тытăмĕнчи планетăсем патне яракан космос аппарачĕсен вĕçев траекторийĕсем. Кĕтмен çĕртен килсе тухакан цивилизаци тата НЛО шыравĕн ыйтăвĕсемпе те интересленнĕ. Вăл ку темăпа «Пĕлÿ» обществăра 100 ытла лекци вуланă. Пĕрремĕш разрядлă спортсмен, инçе дистанцисене чупассипе нумай ăмăртусене хутшăннă.
Эдуардпа 1955 çулхи сентябрьте Элĕкри вăтам шкулта паллашрăм. Ун чухне эпĕ вуннăмĕш класра вĕренеттĕм, вăл – саккăрмĕшĕнче.
Хирлеппуç тата пирĕн Кураккассси ялĕсем юнашарах вырнаçнă та, шкула çитиччен тăватă километр çуранах утаттăмăр. Пире ытларах иксĕмĕр те астрономипе интересленни çывăхлатрĕ. Ку вара ăнсăртран мар, юлташăм шкул пĕтернĕ хыççăн Хусанти патшалăх университетне вĕренме кĕчĕ, пĕлĕт çинчи япаласен орбитине палăртассипе специалист пулса тăчĕ. Диплом умĕнхи практикăна вăл та ман пекех Ленинградри ( халĕ Санкт-Петербург) астрономи теорийĕн институтĕнче ирттерчĕ. Диплом илсен Мускава кайрĕ. Телее ăна тÿрех тĕп хуламăр çывăхĕнчи Королеври наукăпа тĕпчев институтĕнче инженера вырнаçма май килчĕ.
Оборона министерствин наукăпа тĕпчев институчĕн космос уйрăмĕн наука сотрудникĕ пулнă май, ентешĕмпе çыхăнса та ĕçлеттĕм, чылай кăткăс ыйтусене пĕрле татса параттăмăр. Эпĕ техникăна орбитăна кăлармалли тата çĕр çине антармалли траекторие суйласа палăртассипе тимлеттĕм. Юлташăм вара Уйăх, Хĕвел тытăмĕнчи планетăсем патне çул хывассипе тăрăшулăх кăтартатчĕ.
Эдуард спортпа туслăччĕ, чупма юрататчĕ. Пĕтĕм тĕнчери Мускаври марафона хутшăнчĕ. Чылай çул иртсен аслă çулхисем хушшинче виççĕмĕш вырăн йышăнма пултарчĕ. Ун чухне Эдуард утмăл çиччĕреччĕ. Пурнăçа юрататчĕ. Çапах та 2009 çулхи сентябрĕн 9-мĕшĕнче çут тĕнчепе сывпуллашрĕ.
Эдуардпа Галина мăшăрĕ Светлана хĕрĕпе Юрий ывăлне пăхса ÿстерчĕç.
Петр ГРИГОРЬЕВ,
Кураккасси ялĕ.