30 мая 2011 г.
Çынсем эмел курăкĕсемпе авалтанпах усă курнă. Хальхи вăхăтра та вĕсем хаклă чĕртавар шутланаççĕ. Пирĕн тăрăхра 250 тĕрлĕ эмел курăкĕ ÿсет. Çавсенчен 40-шне яхăн «Коопзаготпром» пĕрлешĕвĕсем пуçтараççĕ. Иртнĕ 2010 çулта Чăвашпотребсоюз кооператорĕсем сиплĕ курăксене 292 тонна таран типĕтсе хатĕрлеме пултарнă: çав шутран 30 тонни – Элĕксен тÿпи.
Эмел курăкĕсем пухнă çĕре пенсионерсемпе шкул ачисем кашни çулах активлă хутшăнаççĕ. Татмăш ялĕнчи Галина Сергеева ку енĕпе 25 çул таранах ĕçлет. Иртнĕ çул 1200 килограмм пуçтарнă. Ку ялти Елена Багрова, Хитекушкăньри Зоя Никитина, Тимĕрçкассинчи Галина Яковлева, Тукачри Галина Кириллова та эмел курăкĕсем пухнă çĕрте хастар. Çавăн пекех Лупашка, Тимĕрçкасси, Ярушка ялĕсенче, Дубовски поселокĕнче пурăнакансем ку кирлĕ ĕçрен аякра юлмаççĕ. Шкул ачисенчен Вутлан шкулĕнчен Анжелика Багрова, Питĕшкасси шкулĕнчен Артур Михайлов, Инга Арсентьева, Сергей Петров, Никита Ефимов, Мария Давыдова та ашшĕ-амăшĕсемпе пĕрле иртнĕ çул хастар пулчĕç. Çак вĕренекенсем çуллахи вăхăтра сахал мар ĕçлесе илме пултарчĕç, çу кунĕсене те хаваслăрах, усăллăрах ирттерчĕç.
Эмел курăкĕсене мĕнле пухасси пирки çулленех сĕнÿсем паратпăр, асăрхаттаратпăр-ха. Кăçал та хăшпĕр йĕркесене пăхăнма хушасшăн. Пысăк çулсем хĕррисенче, машина-трактор иртсе çÿренĕ çĕрте сиплĕ курăксене пухмалла мар. Пуçтарнă чухне пĕр тăваткал метрта 3-4 ÿсентăран хăварма, тепĕр çул валли хунав пултăр тесе тăрăшмалла.Хăшпĕр эмел курăкĕсем, тĕслĕхрен, чей курăкĕ, шĕпĕн курăкĕ, матрушке курăкĕ (зверобой, чистотел, душица) пирĕн тăрăхра сахалланса юлчĕç. Малтанхи çулсенче çав курăксене 4-5 тонна хатĕрленĕ пулсан, халĕ питĕ сахал пухăнать.
Пахалăхĕ ан çухалтăр тесе курăксене сулхăн тата витĕр çил вĕрнĕ çĕрте типĕтмелле. Тĕплĕнрех районти «Коопзаготпром» пĕрлешÿре е ялти магазинсенче ыйтса пĕлме пулать.
З. НИКИФОРОВА,
«Коопзаготпром» пĕрлешĕвĕн склад заведующийĕ.