01 июня 2011 г.
Нумай пулмасть эпир пурĕ паттăр халăх Аслă Çĕнтерÿ тунăранпа 66 çул тултарнине анлăн паллă турăмăр. Пур ял тăрăхĕсенче те, пур шкулсенче те вăрçă участникĕсемпе тĕл пулусем иртрĕç. Шел пулин те районта вăрçă ветеранĕсен хисепĕ чаксах пырать, халь вĕсем 70-ĕн кăна юлчĕç.
Пĕтĕм Раççейри ветерансен канашĕ ыйтнипе районти вăрçă участникĕсен учет карточкисене çĕнĕрен йĕркелерĕмĕр. Çак ĕçе вăхăтра тума ял тăрăхĕсен администрацийĕсен специалисчĕсем, районти социаллă хÿтлĕх пайĕн аслă специалисчĕ А.Е.Спиридонова пулăшрĕç. Карточкăсенче вĕсем мĕнле çапăçусенче пулнине, ветерансен наградисене, сывлăхĕпе пурнăç условийĕсене шута илтĕмĕр. Мускав патĕнче пулса иртнĕ çапăçăва хутшăннисенчен пĕрре кăна юлнă. Вăл – Е.Я.Агафонова (Тавăт ялĕ).
Ленинград хули патĕнче çапăçура пулнисенчен пĕрре кăна юлнă, вăл И.Н.Николаев, халĕ 90 çула çитнĕ (Тавăт ялĕ).
Сталинград хули патĕнчи чи хаяр çапăçусене хутшăнакансем те пилĕк районтан чылай пулнă, паянхи куна вĕсем пилĕккĕн. Акă вĕсем: А.Савельев (Смородино ялĕ), А.Моляков (Вырăс Сурăм сали), П.Никифоров, А.Прокопьев (Мăн Вылă ялĕ), П.Леонтьев (Яжуткино)
Курск хули патĕнче пулнă хаяр çапăçăва хутшăннисенчен пилĕккĕн пурăнаççĕ: Д.Михайлов, Е.Федорова (Элĕк сали), А.Трофимов (Изванкă), А.Егоров (Кĕçĕн Тăван), С.Егоров (Сурăмпуç Шĕмшеш).
Украинăна ирĕке кăларнă çĕре хутшăнакансенчен ултăн, Беларуссине – 1, Прибалтика çĕршывĕсене – 2, Прагăна штурмланисенчен – 1, Варшавăна – 4, Югославине ирĕке кăларнисенчен – 2.
А.Шлябин (Элĕк сали), И.Михайлов (Азамат), Н.Кириллов (Мăн Вылă), П.Ильин (Кураккасси), Г.Новиков (Тени) – Инçет Хĕвелтухăç фронтĕнче çапăçнă. Паян пурăнакан вăрçă ветеранĕсемпе ытларах тĕл пулма тăрăшмалла, çитĕнекен ăрăва патриотизмлă воспитани пама анлăн усă курмалла.
Анатолий ТИМОФЕЕВ,
районти ĕçпе вăрçă ветеранĕсен канашĕн председателĕ.