01 июня 2011 г.
Район прокуратури социаллă хăрушă пĕлтерĕшлĕ çемьесемпе профилактика ĕçĕсем ирттерессипе саккунлăха мĕнле пăхăннине тĕрĕслерĕ.
Тĕрĕслÿ çакна кăтартрĕ: вырăнти хăй тытăмлăх органĕсем малтанхи пекех йывăр çемьесемпе ĕçлес, çемьери ăнăçсăрлăхран сыхланса профилактика ĕçĕсем ирттерес ыйтусем çине кирлĕ пек тимлĕх уйăрмаççĕ. Мăн Вылă ял тăрăхĕн администрацийĕ пирки те çавнах каламалла. Муниципаллă пĕрлешÿре йывăр çемьесемпе ĕçлени тивĕçтермест. Вĕсене тата çавнашкал çула çитменнисене вăхăтра тупса палăртассипе мерăсем йышăнмаççĕ. Администрацире право йĕркисене пăсасран профилактика енĕпе ĕç хучĕсене (делопроизводство) кирлĕ пек туса пымаççĕ. Вĕсенче муниципаллă тĕллевлĕ программа çук.
Ял тăрăхĕн администрацийĕнче саккунлăх тата право йĕркисем мĕнле пулни çинчен информаци те çук. Ку енĕпе ĕçлекен специалист муниципаллă пĕрлешÿри лару-тăрăва вуçех те пĕлмест. Уншăн çемьере кам право йĕркине пăсни, преступлени туни те паллă мар. Йывăр çемьесенчи çула çитменнисем çинчен кăтартусене çĕнетсе тăмаççĕ. Социаллă хăрушă лару-тăрури çемьесене тишкернин графикне те туман. Профилактика канашĕн ларăвĕсем вăхăтăн-вăхăтăн ячĕшĕн иртеççĕ. Вĕсенче ытларах йăлапа право йĕркисене пăсакан граждансем хăйсене мĕнле тытни çинчен сÿтсе яваççĕ. Çавăн чухне çула çитменнисене хÿтĕлес, саккунлă интерессемпе тивĕçтерес ыйту çине тимлĕх уйăрмаççĕ. Йĕркеллĕ мар ашшĕ-амăшĕсене саккун ыйтнă пек явап тыттарассине йĕркелемен. Ку ыйтупа правăна сыхлакан органсене, çав шутран прокуратурăна пĕлтĕр, кăçал ку таранччен те информаци тăратман. Çула çитмен ачасен тăватă амăшĕ спирт шĕвекĕсем ĕçнĕрен учетра тăраççĕ. Çапах та вырăнти лару-тăру мĕнле пулни çинчен район администрацийĕн опекăпа попечительство органне пĕлтерессине йĕркелемен.
Социаллă хăрушă çемьесенчи çула çитмен ачасен ашшĕ-амăшĕсемпе профилактика мероприятийĕсем ирттермеççĕ. Учетра тăракан хĕрарăм мĕнле пурăнни, çемье членĕсем, кÿршисем, вĕрентÿ, сывлăх сыхлавĕн учрежденийĕсем ăнлантарни çинчен материалсене пĕтĕмĕшпех пухмаççĕ. Ачисене воспитани парассинчен, пăхса ÿстерессинчен пăрăнакан ашшĕ-амăшĕсем пирки информацисене тивĕçлĕ органсене çитермеççĕ. Çав сăлтава пула ку çынсемпе ĕçленĕ чухне профилактикăн ытти мероприятийĕсемпе, сăмахран, медицина енĕпе, усă кураймаççĕ.
Администрацире йывăр çемьесенчи çула çитмен ачасен пурнăç условийĕсене тишкересси саккунпа килĕшÿллĕн пулса пымасть. Тишкерÿ акчĕсене ячĕшĕн тăваççĕ, лару-тăрăва лайăхлатас енĕпе пĕтĕмлетни, сĕнÿсем те çук. Ашшĕ-амăшĕсемпе профилактика калаçăвĕсем йĕркелемеççĕ. Йывăр çемьесен списокне çулталăк пуçланнăранпа та çĕнетмен. Ашшĕ-амăшĕ тивĕçĕсене пурнăçламаншăн административлă майпа явап тыттарни, ашшĕ-амăшĕн правинчен хăтарни пирки кăçал пĕр информаци те тăратман.
Çемьери, йăлари сферăра преступлени тăвассинчен асăрхаттарассипе ĕçсем «Чăваш Республикинче право йĕркисене пăснине хирĕç профилактика ĕçĕсем ирттересси çинчен» ЧР саккунĕпе килĕшÿллĕн пулса пымаççĕ. Çемьери çапкаланчăксемпе, вăрçса, хирĕçсе пурăнакансемпе ĕçе тĕллевлĕ, конкретлă йĕркелемен. Вырăнти хăй тытăмлăх органĕсем депутат корпусĕн майĕсемпе çителĕксĕр усă кураççĕ.
Профилактика ĕçĕ ял тăрăхĕнче ку енĕпе ĕçлекенсен шайне ÿстерсен, воспитание аталантарассипе çирĕпрех ыйтсан кăна эффективлă пулма пултарĕ. Çавăн пекех интересленекен органсемпе, обществăлла тата ытти организацисемпе, çемьесемпе çыхăнăва çирĕплетни, ачасене тата çамрăксене воспитани парассипе ашшĕ-амăшĕн общественноçĕн рольне ÿстерни те пĕлтерĕшлĕ.
«Раççей Федерацийĕн прокуратури çинчен» РФ саккунĕпе килĕшÿллĕн социаллă хăрушă лару-тăрури çемьесенче профилактика ĕçĕнчи саккунлăха пăхăнманнине пĕтерессипе мерăсем йышăнмалла.
В.ШОРКИН,
район прокурорĕ.