04 июня 2011 г.
Çу уйăхĕн 28-мĕшĕнче Элĕкри вăтам шкулта вĕренÿ çулĕ вĕçленнĕ ятпа савăнăçлă линейка иртнĕ. Вĕренекенсем пурте пĕрле виçĕ хутчен «ура!» кăшкăрнă. Кăçал кунашкал линейкăна кăшт маларах пухăннă, мĕншĕн тесен çу уйăхĕн 30-мĕшĕнче ачасем пĕрлĕхлĕ патшалăх экзаменне тытнă.
Вĕренÿ çулĕ ăнăçлă иртнĕ темелле. Вĕренекенсенчен виççĕшĕ республика олимпиадисенче çĕнтернĕ тата призерсем пулса тăнă, 100 ытла ача район олимпиадисенче мала тухнă, призсене тивĕçнĕ. Шкулти 721 вĕренекенрен 252-шĕ вĕренÿ çулне «4» тата «5» паллăсемпе вĕçленĕ. 58 вĕренекен – отличниксем, 15 ача ĕлкĕрсе пырайманнисен шутĕнче.
Халĕ шкул ачисен çуллахи каникул пуçланчĕ. Вĕсен канăвне лайăх йĕркелеме тата сывлăхне çирĕплетме шкул çумĕнчи сывлăх лагерĕ ĕçлет.