15 июня 2011 г.
Мăн Ямаш ялĕнче пурăнакан Леонид Васильевича ял çыннисем хисеплеççĕ, унран сĕнÿ-канаш илме тăрăшаççĕ.
Л.Степанов тăлăх ÿснĕ пулин те хăйĕн тантăшĕсенчен нимĕнпе те юлса пыман. Кÿршĕри Чутай районĕн Штанаш шкулĕнче, Ямаш шкулĕнче вĕреннĕ. Алла аттестат илсен Етĕрнене çул тытнă. Унта машинист-тракторист профессине алла илнĕ. Çартан таврăнсан юнашарти Яккушкăнь ял хĕрĕпе пĕр çемье çавăрса тăван ялтах тĕпленнĕ. Леонид Васильевич тракторист та, комбайнер та пулнă. Механизаторта ĕçленĕ ĕç стажĕ хĕрĕх çулпа танлашать.
Юратнă мăшăрĕ те Римма Семеновна тăван хуçалăхра вăй хунă. Повар пулнă май ял ĕçченĕсене тутлă яшка пĕçерсе çитернĕ.
Леонид Васильевичпа Римма Семеновна ултă ачана кун çути парнеленĕ. Виçĕ ывăлĕпе виçĕ хĕрне те тĕрĕс воспитани парса ÿстерсе, çĕршыва юрăхлă çынсем тума тăрăшнă. Шел пулин те, улттăмĕш тĕпренчĕкĕн пурнăçĕ вăтăр çула çитичченех татăлнă. Аслă ывăлĕ Валера Яккушкăньре пурăнать. Ялта тĕпленнĕ вăл. Эльвира, Людмила тата Рена ачисем халĕ хăйсен çемйисемпе Шупашкар хулинче. Кĕçĕнни, Алина, Ульяновск облаçĕнче. Шел пулин те, Римма Семеновна паянхи кун мăнуксемпе савăнаймасть. Вăл темиçе çул каяллах çывăх тăванĕсенчен уйрăлса кайнă. Çапла майпа Леонид Васильевич килте пĕчченех тăрса юлнă. Апла пулин те ăна никам та манса кайман. Кашни ачи ашшĕ патне килсе çÿрет, тĕрлĕ ĕçсене пурнăçласа хăвараççĕ. Çичĕ теçеткери мучи пĕчченех хуçалăх тытать. Тĕрлĕ хатĕрсем, куркасем ăсталать. Çак ĕçсене пурнăçлама тĕрлĕ инструмент пур унăн. Пахча-çимĕçе те пĕтĕмпех хăй туса илет. Ăна мотоблок питĕ пысăк пулăшу парать. Юлашки вăхăтра вара Л.Степанов сăвăсем çырма пуçланă. Çакă ăна малалла пурăнма вăй-хал хушать.
Ирина ИВАНОВА.