23 июня 2011 г.
Куракăш çывăхĕнчи вăрман уçланкинче Ехремкасси ял тăрăхĕн ĕçпе спорт тата юрă уявĕ – «Акатуй-2011» иртрĕ.
Ял çыннисемпе хăнисене саламлама район администрацийĕн пуçлăхĕ Леонид Читнаев килнĕ. Леонид Анатольевич район ĕçченĕсем, çав шутра ехремкассисем те çурхи уй-хир ĕçĕсене лайăх йĕркелесе ăнăçлă ирттернине палăртрĕ. Ехремкасси ял тăрăхĕн пуçлăхĕ В.Ефремов пурне те «Акатуй» ячĕпе саламласа ăшă сăмахсем каларĕ, ырлăх-сывлăх, ăнăçу, телей сунчĕ.
Кун хыççăн савăнăçлă концерт пуçланчĕ. Пухăннисене Вутланти тата Карачурари культура çурчĕсенчи юрă-ташă ăстисем хăйсен пултарулăхне кăтартрĕç.
Акатуйçăсем Куракăшра пурăнакан, Тăван çĕршывăн Аслă вăрçин ветеранне Сергей Александрович Шлябина хисеплесе волейбол енĕпе куçса çÿрекен кубок турнирне йĕркеленĕ. Ку тупăшура Куракăш команди çĕнтерчĕ, мини-футболла выляса юманлăхсем мала тухрĕç. Калуш ывăтассипе Куракăшри Сергей Михайловпа Юлия Мельника çитекенни пулмарĕ. Шăчă тăрăх çÿлелле хăвăрт хăпарассипе кам пулчĕ тетĕр-и; Ку вăл – Юманлăхри Андрей Яковлев. Хăй вăхăтĕнче Куракăшри Александр Парамонов паллă спортсмен пулнăччĕ, кире пуканĕ йăтассипе пурне те парăнтарнăччĕ. Ашшĕ ячĕпе унăн ывăлĕсем кире пуканĕ йăтассипе парне хатĕрленĕ, ку ăмăртура Александр Григорьевичăн ентешĕсем С.Г.Михайлов, Б.А.Мошков тата С.А.Михайлов палăрчĕç.
С.ТИМОФЕЕВ сăн ÿкерчĕкĕсем.