23 июня 2011 г.
Ача чухне мĕнле кăна професси илĕртмест-ши; Ÿссе çитсен çынсене сыватакан тухтăр е артистка пулма ĕмĕтленетпĕр. Вăхăт иртнĕ çемĕн вара малтанхи шухăш-кăмăл тĕтĕм евĕрех сĕвĕрĕлет, урăх специальность чĕрене тыткăнлать. Таня вара хăйĕн ĕмĕтне нихăçан та улăштарман.
– Мĕншĕн илĕртнĕ тетĕр-и медицина ĕçченĕн профессийĕ; Татăклăн калаймастăп. Йăмăк та, эпĕ те çак çула суйласа илтĕмĕр, – паллаштарчĕ хăйĕн тăванĕсемпе Элĕк район больницинче куç тĕрĕслекен пÿлĕмре ĕçлекен çамрăк хĕрарăм.
Таня пĕчĕк чухнех амăшĕн шурă халатне тăхăнса Инна йăмăкĕпе «тухтăрла» вылянă. Мĕн ачаранах çак туртăм аталаннă. Чăваш патшалăх университечĕн медицина факультетне Т.Федорова 2006 çулта вĕренсе тухнă.
– Çынна сыватакан çынсене мĕн пĕчĕкрен хисеплеттĕм. Шур халатлă ĕçченсем пек ырă кăмăллă, вашават пулма тăрăшаттăм, – калаçăва малалла тăсрĕ çамрăк специалист.
Т. Федорова – Писер хĕрĕ. Амăшĕ Л.В.Капитонова хирурги уйрăмĕнче нумай çул вăй хурать, медсестрара тăрăшса ĕçлет. Таньăн йăмăкĕ те Инна Никонорова райцентрти больницăрах дерматовенеролог ĕçĕсене пурнăçлать.
– Шел пулин те, атте пирĕнпе савăнса пурăнаймарĕ, тăватă çул каялла сарăмсăр уйрăлчĕ, – терĕ Т.Федорова. – Хăй вăхăтĕнче вăл «Сельхозхимире» тата Хирлеппуç ял администрацин ертÿçинче ĕçлерĕ.
Татьяна Юрьевна компьютера та алла илнĕ. Унта умри тĕллевĕсене, пурнăçланă ĕçĕсене палăртать.
Чăн-чăн тухтăр пулас тесе Таня Федорова пĕр çул интернатура йĕркипе терапи пĕлĕвне ÿстернĕ. Ку енĕпе те хăйĕн тивĕçĕсене тăрăшса пурнăçланă.
2006 çулта çамрăк хĕр хăйĕн телейне тупнă. Çирĕккасси ялĕнчи Слава Федоровпа паллашса çемье çавăрнă. Халĕ вĕсем Федоровсен тĕп килĕнче ашшĕ-амăшĕпе тата хăйсен икĕ ачипе пурăнаççĕ. Çемьере кашниех ĕçе юратнине, пĕр-пĕрне çур сăмахранах ăнланнине те пытармарĕ Т.Федорова.
Пирĕн калаçу нумая пымарĕ. Çамрăк тухтăр чирлĕ çынсене хăйĕн патне черетпе йышăнма пуçларĕ.
– Сылтăм куçне хупăр-ха, халĕ вара сулахайне, – терĕ пукан çинче ларакан арçынна. – Миçе пÿрне куратăр; Хăçантанпа чирлетĕр;
Ыйту çине ыйту пачĕ вăл, ватăн сывлăхĕпе интересленчĕ, кирлĕ эмелсем çырса пачĕ.
Вера МОРОЗОВА.