29 июня 2011 г.
Элĕкри культурăпа кану центрĕнче июнĕн 23-мĕшĕнче вун пĕрмĕш класс пĕтернисен ăсату каçĕ иртрĕ.
Ăна Элĕкри вăтам шкул директорĕ В.Волков уçрĕ. Вĕренсе пĕтерекенсене район администрацийĕн пуçлăхĕ Л.Читнаев та салам сăмахĕсем каларĕ.
– Яланах хăюллă пулмалла, ума лартнă тĕллевсене пурнăçлама пĕлмелле тата вĕçне çитермелле. Сире сывлăх, ăнăçу, телей сунатăп, – терĕ Леонид Анатольевич.
Элĕк район прокурорĕ Валерий Шоркин та хĕрсемпе каччăсене ăшă сăмахсем каласа саламларĕ.
Хыççăн вĕренсе пĕтернисене аттестатсем тыттарчĕç. Кăçал Элĕк шкулĕнчен 67 вĕренекен уйрăлчĕ. Вĕсем хушшинче ылтăн медальпе пĕтерекенни – Павел Павлов, кĕмĕл медальпе Александр Степанов пулчĕç.
Юлашкинчен ачасен ашшĕ-амăшĕсемпе класс ертÿçисем сăмах илчĕç, шкул пĕтерекенсене пурнăçра ăнăçу сунчĕç.
А.СИЛИВЕСТРОВА.