29 июня 2011 г.
Яккушкăнь хĕр ачи Валя Мăн Ямаш шкулĕнчен лайăх паллăсемпе вĕренсе тухнă. Хыççăн Мăн Вылăри вăтам шкула та ăнăçлă пĕтернĕ. Лайăх вĕреннине шута илсе ăна пĕлĕвне малалла аслă шкулта ÿстерме сĕннĕ. Çапах та хăйĕн тĕллевĕнчен иртмен. «Хĕрарăмăн çĕлеме пĕлмелле. Эпĕ çĕвĕç профессине илетĕп», – тенĕ Валя. Çутă ĕмĕтне пурнăçлас тĕллевпе Çĕрпÿри училищĕрен вĕренсе тухать. Ĕç биографине вара хулара пуçлать Яккушкăнь хĕрĕ.
Анчах та унăн пурнăç çулĕ тăван кĕтесĕ еннеллех выртнă. Мĕншĕн тесен ăна шкулта пĕр класра вĕреннĕ Ямаш каччи Леонид сăнасах пурăннă. Юратнă хĕре хăйĕнчен вĕçертмен. Çапла вара Валя унăн мăшăрĕ пулса тăрать. Çичĕ юта тухсан та çĕвĕç ĕçне пăрахман-ха вăл. Тĕрлĕ çи-пуç çĕлессипе заказ хыççăн заказ пурнăçлать Валентина Николаевна.
Пĕррехинче ăна хуçалăх правленине чĕнсе илеççĕ.
– Валя, эсĕ математикăна питĕ лайăх пĕлеттĕнччĕ. Çавăнпа эпир сана бухгалтер ĕçне шанасшăн, – тенĕ «Выла» хуçалăх ертÿçи.
Çамрăк хĕрарăм килĕшнине пĕлтерет. Шут ĕçченĕн тивĕçне тÿрре кăларассишĕн тăрăшма пуçлать. Валентинăна Ямашран Кивуя кулленех утма инçерех пулнă-ха. Çавна май пурăна-киле ялти фермăна ĕçлеме куçать. Кунта выльăх самăртакан доярка, ферма заведующийĕ те пулать.
Мăшăрĕпе пĕрле икĕ ывăлпа виçĕ хĕрне тĕрĕс-тĕкел пăхса ÿстереççĕ.
– Икĕ хунямапа вăтăр пĕр çул таранах пурăнтăм. Пĕрне тăхăр вун тăватă çула çитичченех пăхрăм, – тет халĕ тивĕçлĕ канăва тухнă В.Игнатьева.
Вĕсем мăшăрĕпе мăнукĕсемпе савăнаççĕ. Ирина кинĕ С.Волков хресчен-фермер хуçалăхĕнче поварта тимлет. Славик ывăлĕ те ĕçлемесĕр пурăнмасть.
Владимир НИКИФОРОВ.
Сăн ÿкерчĕкре: В.Игнатьева Лида мăнукĕпе.