02 июля 2011 г.
Кĕçнерни кун районта суту-илÿ ĕçченĕсем Пĕтĕм тĕнчери коопераци кунне паллă турĕç.
Райпо пуçлăхĕ Юрий Харитонов, уява уçса, кăçалхи ĕç-хĕл çинче чарăнса тăчĕ. Райпон тавар çаврăнăшĕ те, тавар туса кăларасси те ÿссех пырать. Чувашпотребсоюз канашĕн йышăнăвĕпе килĕшÿллĕн кăçалхи республика ăмăртăвĕн пĕремĕш кварталти кăтартăвĕсем тăрăх Элĕк райповĕ пĕтĕмĕшле ĕç-хĕл енĕпе пĕрремĕш вырăна тухнă. Юрий Александрович суту-илÿ ĕçченĕсене уявпа ăшшăн саламларĕ, ĕçре ăнăçу сунчĕ. Элĕк район пуçлăхĕ – депутатсен Пухăвĕн председателĕ В. Дубинин суту-илÿ ĕçченĕсене ялан ÿсĕм çулĕпе утма сĕнчĕ. Район администрацийĕн пуçлăхĕ Л.Читнаев райпо район экономикинче пĕлтерĕшлĕ вырăн йышăннине палăртрĕ, уявпа ăшшăн саламларĕ. Ун хыççăн Çĕмĕрле районĕнчен килнĕ хăнасем салам сăмахĕсем каларĕç. Уявра ĕçре палăрнисене парнесемпе чысларĕç.
Çав кун суту-илÿ ĕçченĕсем тĕрлĕ конкурссенче тупăшрĕç, чăваш эстрада артисчĕсен концертне пăхрĕç.