02 июля 2011 г.
Тавăтри ача садĕнче вăй хуракан Алина Комиссарова пĕчĕк шăпăрлансемшĕн чи çывăх тус-юлташ вăрăнĕнчех. Вĕсем хăйсен воспитателĕнче хÿтлĕх шыраççĕ, ăна шанаççĕ, ĕненеççĕ.
– Кашниех чуна çывăх. Ĕçрен киле таврăнсан та вĕсем пиркиех шутлатăп, – пуплерĕ А.Комиссарова воспитатель.
Сывă пурнăç йĕркине хаклать
Шкулта вĕреннĕ чухнех Алина медицина енĕпе пĕр-пĕр пĕлÿ илме ĕмĕтленнĕ. Анчах хăй шутланă пек пулса тухман.
– Пĕр пĕлĕшĕм Волгоградри физкультура институчĕн филиалĕнче вăй хуратчĕ. Вăл хистенипех тантăшăмпа ун патне вĕренме кайрăмăр. Юлташ экзаменсем витĕр тухаймарĕ. Эпĕ вара тÿлевсĕрех вĕренме кĕтĕм. Физкультурăпа унчченех питĕ туслăччĕ.Шкул сакки çинчех 1 разряд пулнă манăн. Ытларах вăтам дистанцисене чупассине кăмăллаттăм, – сăмах вакларĕ Алина Геннадьевна.
Алла диплом илсен Хитекушкăнь хĕрĕ киле таврăнать. Шураç каччипе çемье çавăрать. Пĕр вăхăт вăл районти тĕп больницăра сиплев физкультурин инструкторĕнче ĕçлет. Кайран Хирлеппуç шкулĕнче физкультура учительне вырнаçать. Тăхăр çул ачасене сывă пурнăç йĕркине пăхăнма вĕрентет Алина Геннадьевна. Кунсеренех Шураçран çуран утать. Çулсем иртсен А.Комиссарова валли тăван кĕтесрех ĕç тупăнать.
– Тавăтри ача садĕнче каçхи ушкăнра ĕçлеме воспитатель кирлине пĕлтерчĕç. Малтанах шиклентĕм. Халĕ вара акă вĕсемсĕр хамăн пурнăçа курмастăп та. Çапла 2006 çултанпа ача садĕнче вăй хуратăп, – пурнăçĕ пирки каласа пачĕ ырă кăмăллăскер.
Виçĕ ачана кун çути парнеленĕ
Ĕçре кăна мар, килте те Алина Геннадьевна воспитатель вырăнĕнчех. Владимир Сергеевич мăшăрĕпе вĕсем виçĕ ачана пурнăç парнеленĕ. Сергей ывăлĕ шкултан вĕренсе тухнă та ĕнтĕ. Килте вара Максимпа Света.
Алина Геннадьевнан мăшăрĕ куçăмсăр майпа ял хуçалăх академийĕнче бухгалтер-экономиста вĕреннĕ. Малтанах хуçалăхра бригадирта, унтан бухгалтерта вăй хунă. Халĕ вара ирĕксĕрех ют хуласене тухса çÿреме тивет.
А.Комиссарова районти ăмăртусене те хаваспах хутшăнать.
И. ИВАНОВА.