06 июля 2011 г.
Элĕкри вăтам шкултан вĕренсе тухнă хыççăнах райцентрти инкубаторпа кайăк-кĕшĕк станцине (ИПС) кăмăлпах йышăннă Нинăна. Торпкасси хĕрĕ ятарлă установкăсемпе çăмартасенчен чĕпĕсем кăларнă предприятире вăй хурать.
Вăхăт иртсен Элĕкре кăна-и – пур çĕрте те пĕтереççĕ инкубаторпа кайăк-кĕшĕк станцине. Торпкасси хĕрĕн урăх ĕç шырама тивнĕ.
– Нина, эпĕ декретлă отпуска каятăп. Эсĕ ман вырăна юлма килĕшмĕн-ши; – тенĕ ăна Элĕкри типографире ĕçлекен пĕр ял çынни Раиса.
Н.Серафимова çамрăк хĕрарăм сĕнĕвĕпе килĕшет. Çапла вара районта тухса тăракан «Ленин çулĕпе» хаçат типографийĕнче ĕçлеме тытăнать. Хаçат страницисене (полосасене) алăпа пуçтарса тултармалла пулнă. Кăштахран ăна линотиписта (хаçата машинăпа наборлакан) вĕренме яраççĕ. Полиграфи отраслĕнчи çĕнĕлĕхе те алла илет Нина Серафимовна. Полосасем валли йĕркесем (строка) шăратса кăларассипе ĕçлет.
Пурнăç çулĕ ăçта кăна çитермест-ши çынна; Нина Серафимовнăн Шупашкарти лента тĕртекен фабрикăра та вăй хума тивет.
– Нина, хăвăртрах яла таврăн. Эпĕ пĕччен пурăнаймастăп, – тет Н.Серафимовăна Сурăмварри ялĕнчи София аппăшĕ.
Унăн мăшăрĕ, комбайнерта ĕçленĕскер, сарăмсăр вилсе кайнă. Аппăшĕн ыйтăвне тивĕçтермесĕр пултараймасть йăмăкĕ. Унпа пĕрле пурăнма килĕшет. Иккĕшĕ те «Яргунькинский» хуçалăх ĕçĕсене хастар хутшăнаççĕ.
Н.Серафимова, Торпкасси хĕрĕ пулнăскер, Сурăмваррине куçса килнĕренпе вăтăр çул та иртнĕ ĕнтĕ. Хальхи вăхăтра пĕчченех кун ирттерет. Аппăшĕ пурнăçран уйрăлнăранпа кĕçех икĕ çул та çитет. Нина Серафимовнăна Витя шăллĕпе кинĕ пулăшса пыраççĕ.
С.СВЕТЛОВА.