09 июля 2011 г.
Элĕк салинчи культурăпа кану центрĕнче районта çуралса ÿснĕ, Афганистанра, Чечен республикинче пуçĕсене хунисене асăнса палăк уçрĕç.
Ку мероприяти – хăюлăхпа паттăрлăх кăтартнă мĕн пур салтаксемпе сержантсене, офицерсемпе генералсене, паттăрсен вилĕмĕпе пуçне хунă ывăлĕсен ашшĕ-амăшĕсене чысласа хисеп туни. Хăйсен пурнăçне шеллемесĕр тăван çĕршыв умĕнчи тивĕçе чыслăн пурнăçланисем ĕмĕр-ĕмĕрех асра.
Митинга «Афганистан ветеранĕсен Раççейри Союзĕ» Пĕтĕм Раççейри обществăлла организацийĕн Чăваш Республикинчи уйрăмĕн Элĕк районĕнчи ертÿçи В.Н.Иванов уçрĕ.
Район администрацийĕн пуçлăхĕ Л.А. Читнаев хăйĕн сăмахĕнче çакна палăртрĕ:
– Паян, палăк уçнă май, эпир интернационалла тивĕçе пурнăçланă салтаксен паттăрлăхĕ, çухату тÿсме питех те йывăрри çинчен аса илетпĕр. Хăйсене шеллемесĕр тăван çĕршыв умĕнчи тивĕçе пурнăçланисене асăнса пуç таятпăр. Вĕсене яланах асра тытасси – пирĕн тивĕç,– терĕ.
– Паян Раççей карттинче тата тепĕр çăлтăр çуталчĕ. Ку Афганистанра, Чечняра, ытти локальнăй вăрçăсенче пуç хунисене асăнса лартнă палăк, – сăмах илчĕ «Афганистан ветеранĕсен Раççейри Союзĕн» Пĕтĕм Раççейри обществăлла организацийĕн Чăваш Республикинчи организацийĕн председателĕ И.М.Кашаев.
Митингра Муркаш тата Элĕк районĕсенчи çар комиссарĕ В.Е.Андреев, Чăваш Республикинчи çар комиссарĕн ветерансем енĕпе ĕçлекен пулăшаканĕ А.П.Осипов, «Собор» спецназĕн командирĕ, полковник – пирĕн ентеш Ю.И.Григорьев та калаçрĕç.
Юлашкинчен палăк умне чечексем, чечек кăшăлĕсем хучĕç. Çапăçусенче вилнисене асăнса пĕр минут шăп тăчĕç.
Хура гранит плита çине пирĕн ентешсен 8 ятне кĕртнĕ. Вĕсен паттăрлăхĕ ĕмĕр-ĕмĕрех чĕресенче упранĕ, пулас ăрусемшĕн ырă тĕслĕх пулĕ.