09 июля 2011 г.
Арлановсен ăрăвĕ аталанса, вăй илсе пыни, хăй хыççăн ырă йĕр хăварни яр-уççăнах палăрать.
Димитрий Арланов çамрăк чух хăйĕн тантăшĕсене ĕçре те, кĕрешÿре те çĕнтернĕ. Вăл вун пилĕк çула çитсен аслисемпе тан ĕçлеме тытăнать. Митри çил арманĕ туса хута ярать. Ун патне тырă авăртма килме пуçлаççĕ.
Арçын авланать. Унăн Аристарх, Хĕветĕр, Митри ывăлсем çуралаççĕ. Кусем, юмахри пекех, тĕрĕс- тĕкел те сывă ÿснĕ. Çемьеллĕ те пулаççĕ. Хĕветĕр, сăмахран, Кĕçĕн Тăван хĕрне качча илет. Вĕсене ашшĕ уйăрса кăларать. Мăшăрсем питĕ килĕшÿллĕ пурăнаççĕ. Йышне те хушсах пыраççĕ. Пĕрремĕш ывăлĕ – Гаврил. Вăл иккĕмĕш тĕнче вăрçине хутшăнать, хăюлăхпа паттăрлăх кăтартать. Анчах та вăрçă хирĕнчех выртса юлать.
Иккĕмĕшĕ – Костя, ăслă, тăнлă пулнипе палăрнă. Кĕнекепе туслашнă. Шкула кайичченех çырма, вулама, шутлама та вĕреннĕ. Ураскилтри çичĕ класлă шкул хыççăн Калининăри педучилищĕре пĕлĕвне ÿстернĕ. Каччă институт та пĕтернĕ.
Костя райкомăн виççĕмĕш секретарĕнче, райĕçтăвком председателĕнче те вăй хурать. Çав тапхăрта районшăн ырă ĕçсем сахал мар тăвать. Хамăр еннелле тăсăлакан çула çĕнетекенни шăпах Константин Федорович пулать. Ку аслă çула, район шайĕнче илсен те, «Арланов çулĕ» тетчĕç.
Федор Никитичăн виççĕмĕш ачи – Ольга. Вăл ялти ятлă каччăпа Пантелеймон Алицевпа пĕрлешрĕ. Ураскилт шкулĕнче хими предметне вĕрентрĕ. Шкул директорĕн тивĕçĕсене те чылай вăхăт пурнăçларĕ.
Л.ФЕДОРОВ,
Ураскилт ялĕ.