09 июля 2011 г.
Торпкасси ялĕнче вырнаçнă «Сире валли» ятлă лавккара ăшă кăмăллă та сăпайлă хитре хĕр ĕçлет. Вăл ял халăхне таварпа тивĕçтерессишĕн кунран-кун ырми-канми тăрăшать. Сарă çÿçлĕ хĕр ялти кашни çынпа тарават. Ватăсемпе те, çамрăксемпе те, ачасемпе те, аякран килнĕ çынсемпе те пĕр чĕлхе тупма пултарать. Кашнинпех ырă кăмăллă вăл. Хăйĕнпе сăмахлама пуçласан мĕн ятлине те пытармарĕ. Ку Надежда Захарова пулчĕ иккен.
Çак лавккара ĕçлеме пуçлани нумаях пулмасть унăн. Тепĕр сутуçăпа пĕрле ылмашăнса кашни кун ирхи саккăртан пуçласа каçхи тăххăрччен тăрăшаççĕ.
Надя 1985 çулта Торпкасси ялĕнчех çуралнă. Тăван ялтан ют çĕре каяс кăмăлсем пулман унăн. Мăшăрне те çуралса ÿснĕ вырăнтанах суйласа илнĕ вăл. Владимир Захаровпа икĕ ачана çуратса кун çути парнеленĕ. Асли Ксения иккĕмĕш класс та пĕтерчĕ ĕнтĕ. Кĕçĕнни Алексей пилĕк çулта. Кĕçех шкула та кайма вăхăт çитет. Надьăн мăшăрĕ ют хуласене тухса çÿресе çемьене тăрантарать. Ачасене ура çине тăратас тесе тăрăшать. Килес çул Захаровсем пĕрлешнĕренпе вунă çул çитнине те паллă тăваççĕ.
Надя Хирлеппуç шкулĕнче тăхăр класс вĕреннĕ хыççăн тепĕр иккĕшне Элĕкри вăтам шкулта вĕренсе пĕтернĕ. Етĕрнери лицейра çĕвĕç профессине алла илнĕ. Калаçу хĕрнĕçемĕн вăл ялти пурнăçа пуринчен ытла савнине те пытармарĕ.
– Манăн хулара пурăнас килмест. Унта сывлăшĕ те таса мар, ялта уçă сывлăш, çут çанталăк та килĕшет, лăпкăлăх та хуçаланать, – терĕ Торпкасси ялĕнчи сарă хĕр. – Ĕç те мана кăмăла кайрĕ. Кунта ĕçлеме питĕ килĕшет.
Унăн мăшăрĕ Владимир Инçет Хĕвелтухăçра пограничник пулса салтак службине ирттернĕ. Унтан темиçе çул Элĕкре «Сельхозхиминче» вăй хунă. Халĕ мăшăрсем ачисене тĕрĕс çул çине тăратассишĕн тăрăшаççĕ.
А.СИЛИВЕСТРОВА.