09 июля 2011 г.
– Шкулта вĕреннĕ вăхăтра пĕр класра тантăшсемпе ăмăртмалла тенĕ пек тĕрлеттĕмĕр. Эпĕ ыттисем пекех аннерен ал ĕçне вĕреннĕ. Шкулта ĕç урокĕсенче ăсталăха малалла туптанă, – пуçларĕ калаçăва Атмалкасси ялĕнче пурăнакан Оля Казакова.
Хăйĕн пирвайхи ĕçне те астăвать вăл. Ĕç урокĕнче сăмса тутри тĕрленĕ хĕр ачасем. Ăна кайран амăшне парнеленĕ.
Мăн Вылăри вăтам шкултан вĕренсе тухнă çамрăк ăс пухма малалла каяйман. Оля Хĕрлĕ Чутай районĕнчи Упăкушкăнь ялĕнче больницăра ĕç вырăнĕ тупнă. Вăл пĕр вăхăт санитаркăра ĕçленĕ. Ĕçчен те ÿркенмен хĕре тĕрлĕ ĕç шанса панă. Оля нихăçан та турткаланса тăман. Больницăра хĕр япаласем те çунă, апат та пĕçернĕ. Кашни кунах Атмалкасси ялĕнчен кÿршĕ района ĕçе васканă. Каçхине киле таврăнсан алла йĕппе çип тытса тĕрĕ тунă.
Пултаруллă та ĕçчен хĕре юнашар ял каччи А.Казаков тахçанах куç хывнă пулин те, юрату сăмахĕсене калама вăтаннă-ха. Кашни кун тенĕ пекех курнăçнă вĕсем. Ялĕсем те юнашарах. Атмалкасси Элĕк районĕн пулсан, Урикасси вара Хĕрлĕ Чутай районне кĕрет.
Кÿршĕ ял каччипе Атмалкасси хĕрĕ 2001 çулта пĕр çемьене чăмăртанма шут тытаççĕ. Çирĕм çул тултарнă Оля Казаковсен кинĕ пулса тăрать. Унăн мăшăрĕ Саша Урикассинчех çуралса ÿснĕ. Вăтам шкул пĕтернĕ çамрăк пĕлĕвне ÿстерме Çĕмĕрле хулине кайнă. Унта вăл водителе вĕренсе тухнă, хыççăн çар ретне тăнă. Салтакран таврăнсан Саша Штанашри «Маяк» хуçалăхра водительте, çав хушăрах трактористра тăрăшнă.
Казаковсем малтанах Урикасси ялĕнче тĕпленнĕ. 2009 çулта вара çамрăк мăшăр тĕп килтен уйрăлса тухса Атмалкасси ялĕнче çурт туяннă, çав çулах унта пурăнма тытăннă. Казаковсем пĕр ывăл ачана кун çути парнеленĕ. Алеша кăçал кĕркунне тăватă çул тултарать. Кил хуçи арçынĕ ялта ĕç çукран «шапашкăсене» çÿрет. Оля мăшăрĕ вара килти хуçалăхра выльăх-чĕрлĕхпе аппаланать. Çулсеренех икĕ ĕне, темиçе пуç сурăх тытаççĕ вĕсем.
– Пушă вăхăт тупăнсанах алла йĕппе çип тытатăп. Тĕрлемесĕр пĕр кун та иртмест, – терĕ Оля илемлĕ тĕрĕсем кăтартнă май.
Алеша ывăлĕ те амăшĕнчен юласшăн мар-ха. Вăл та ун çумне пырса ларса тĕрлеме тăрăшать. Пÿрте кĕрсен ăçталла пăх – унта тĕрĕ. Илеме юратакан хĕрарăма ку ĕçпе аппаланни савăнăç çеç кÿрет.
Вера МОРОЗОВА.