13 июля 2011 г.
Тенири çыхăну уйрăмĕнчен яра куна çын татăлмасть. Пурне те ăшă кăмăлпа йышăнаççĕ кунта, ыйтăвĕсене те çийĕнчех тивĕçтерме тăрăшаççĕ. Тăхтав вăхăтĕнче вĕренекенсем çыхăну уйрăмне йышлăн çитрĕç.
– Алина Альбертовна, мана хитре открытка туянтарăр-ха, терĕ сарă çÿçлĕ хĕр ача.
– Эпĕ ручка илме килтĕм. Пастине уйрăммăн та парăр-ха, – терĕ ун çумĕнчи те.
Шкул ачисем тем хушăрах хăйсене кирлине туянчĕç те васкасах тухса кайрĕç. Пÿлĕмри шăплăх нумаях пымарĕ-ха. Аслă çулхисем пĕрин хыççăн тепри килсех тăчĕç. Кармал ялĕнчен пĕри, авă, электричество энергийĕпе, газпа усă курнăшăн тÿлеме пынă. Тепри сахăр песукне туянасшăн. Виççĕмĕшĕ вара куллен кирлĕ вак-тĕвек япаласем илесшĕн.
– Чăнах та, тĕрлĕ енлĕ ĕç тăватпăр. Ку чухне хаçат-журнал çырăнтарса валеçнипех çырлахаймăн. Ял çыннисене нумай енĕпе пулăшатпăр. Тĕрлĕ таварсем, хаçат-журнал уйрăммăн та сутатпăр, – паллаштарчĕ хăйсен ĕçĕпе çыхăну уйрăмĕн ертÿçи Алина Иванова.
Кунта интернета тухма майсем пур. Электронлă почта ĕçлет. Çур çул валли хаçат-журнал çырăнтарнă тапхăрта çыхăну ĕçченĕсен уйрăмах канăç пулман. Икĕ почтальонкăн ĕç калăпăшне пĕчĕк тееймĕн. Галина Николаева Эренар, Тени ялĕнче пурăнакансем патне кулленех çитет. Алина Орлова вара Хирлеп, Кармал çыннисемпе уйрăлми çыхăннă. Ăнлантару ĕçне тивĕçлипе пурнăçлама тăрăшаççĕ вĕсем, килĕшекен кăларăмсене суйласа илме пулăшаççĕ.
Малтанхипе танлаштарсан, подписка йывăртарах иртнине палăртрĕ Алина Альбертовна ертÿçĕ. Çав хушăрах вулама юратакансемсĕр те мар Тени тăрăхĕ. Эренар ялĕнчи Людмила Максимова, Наталия Иваничева, Татьяна Капарова, Тенири Светлана Герасимова, Екатерина Осипова, Зоя Герасимова та хаçат-журналпа туслисен шутĕнче пулнине пĕлтерчĕç.
Кивелсе япăхнă çуртра вырнаçнă почта. Хĕллехи вăхăтра пÿлĕмсене кăмака хутса ăшăтнă. Нумай çул каяллахи кăмакан хĕрÿлĕхĕ вара тахçанах чакнă.
Г.СЕРОВА.
Сăн ÿкерчĕкре: А. Иванова ертÿçĕ.