16 июля 2011 г.
– Вырма çывхарать. Тыр-пул пухса кĕртме хатĕрленетпĕр. Комбайна ывăлпа пĕрле ĕçлеттерме шутларăмăр. Халĕ юсав ĕçĕсенче тимлетпĕр, – терĕ Хуравар ялĕнче пурăнакан Сергей Николаев.
Вăл опытлă комбайнер. «Таутово» хуçалăхра сахал мар вăй хурса ĕçленĕ. Тырă вырассипе хуçалăхра кăна мар, районта та палăрнă, малти вырăнсене темиçе хутчен те йышăннă. Çавна май район депутачĕ пулма та тивĕçнĕ. Техника енне туртăмĕ вара ăна ашшĕнчен куçнă. Çывăх çынни ывăлне ачаллах комбайнпа ĕçлеме явăçтарнă вĕт.
– Çичĕ класс пĕтернĕ хыççăнах мана атте хăйĕн пулăшаканĕ пулма шаннăччĕ. Хыççăн çулленех унпа пĕрле уй-хирте тырă вырнă эпĕ. Малтанах пулăшаканра тимленĕ пулсан, каярах штурвалне те хамах алла тытнă, – çапла аса илчĕ пуçласа комбайн çине ларнине Сергей Иванович.
Пулăшаканра нумай çул тăрăшнă хыççăн «уй-хир карапĕн» хуçи пулма та тивĕçет çамрăк. Ашшĕ, Иван Николаевич, вăталăх ывăлне Сергея кăна мар, аслине Федьăна, кĕçĕннине Кольăна те техникăпа ĕçлеме хăнăхтарать. Çапла пĕр вăхăт Николаевсем «Таутово» хуçалăх ĕçĕсене виççĕн пĕр харăсах хутшăннă. Кил хуçи Иван Николаевичпа Сергей ывăлĕ пĕрер комбайнпа тырă вырнă пулсан, аслă ывăлĕ Федя косилкăпа курăксем çулнă.
Ял хуçалăх предприятийĕн ĕçĕсене халĕ те хаваспах хутшăннă пулĕччĕ Сергей Иванович. Анчах та «Таутово» юхăнса арканни темиçе çул та иртнĕ ĕнтĕ. Мĕнех тăвăн, Сергей Николаевăн та, ытти чылай вăйпитти çынсем пек, ĕçлеме аякка тухса кайма тивнĕ. Чун-чĕреллĕ арçын Мускаври стройкăсенче кăна мар, Сочи хулинче те çичĕ уйăх таранах ĕçленĕ.
Ялти çамрăк фермер Сергей Терентьев хăй патне ĕçлеме чĕнсен хирĕçлесе тăма пултарайман Сергей Николаев. Вăл çĕнĕлле ĕçлекен çынна çурхи уй-хир ĕçĕсене ирттерме пулăшнă. Пур тĕрлĕ тĕш тырă культурисене, çĕр улми, пахча-çимĕçсене пысăк лаптăксем çине акса-лартса хăварнă. Фермер тыр-пул пухса кĕртнĕ çĕрте ĕçлеме те опытлă механизаторах шаннă. Çавна май халĕ С.Николаев тимлесех вырмана хатĕрленет. Юсав ĕçĕсене аслă ывăлĕпе Иванпа иккĕшĕ пурнăçлаççĕ. Ашшĕпе ывăлĕ комбайна тухăçлă ĕçлеттерме ĕмĕтленеççĕ.
С.ИВАНОВА.
Сăн ÿкерчĕкре: С.Николаев.