20 июля 2011 г.
Нумай ăшă сăмах илтме пулать Мăн Ямашри медпунктра ĕçлекен Р.Баранова санитарка çинчен. Кунĕпех çын татăлмасть ял варринче вырнаçнă фельдшерпа акушер пунктĕнчен. Мĕн чухлĕ сиплев процедури тумаççĕ-ши кунта, ывăннине пăхмасăрах кунĕпе ырă та лăпкă хутшăнура чирлисемпе.
– Тепĕр чух йышăну пÿлĕмĕнче çирĕм ытла çын та пулать, – пĕлтерчĕ хĕрарăм. Уйрăмах кĕрхи-çурхи вăхăтсенче, грипп анлă сарăлнă чух, сипленекенсен йышĕ ÿсет.
Раиса Александровна медицина сестрин ĕçĕсене пурнăçласа пынине те пытармарĕ. Канашри медучилищĕре пĕлÿ илнĕскере яваплă ĕç шанса панă. Çамрăксемпе çамрăкла, ватăсемпе ватăлла пулма пĕлет вăл.
– Ырă кун пултăр! – сывлăх сунчĕ медпункта килнĕ Зоя Ильина. – Темшĕн паян ăш вăркать, юн пусăмĕ пĕчĕк мар пулĕ те, виçсе пăх-ха, тархасшăн.
Р.Баринова тÿрех хĕрарăма йышăну пÿлĕмне илсе кĕртрĕ, ларма сĕнчĕ.
–Чăнах та, сирĕн артери пусăмĕ пĕчĕкрех, – терĕ Раиса Александровна, хĕрарăма кирлĕ эмелсем çырса пачĕ.
– Тавтапуçах, – терĕ чирлĕ çын.
Кама та пулин медицина пулăшăвĕ кирлĕ-тĕк килти ĕçсене, çанталăка пăхмасăр ялти çынсем патне васкани темиçе те пулнă.
Борис Викентьевичпа икĕ ывăлпа пĕр хĕр çитĕнтернĕ. Ачисем пурте ура çине тăнă. Раисăпа Борис Барановсем асаннепе асатте пулнă. Вĕсем тахçанах çĕр ĕçĕпе ĕçлеме пуçланă. Çавăн пекех килти хуçалăхра тăватă пуç ĕне, пăрусем, сурăхсем хур-кăвакалсем усраççĕ.
Пушă вăхăт тупăнсан алла йĕппе çип тытса тĕрленине, алсиш-нуски çыхнине те пытармарĕ хĕрарăм.
М.ШОРИНА.