20 июля 2011 г.
Пĕр-пĕрне юратнине, йывăр вăхăтра пулăшнине пурнăçра нимĕн те çитмест. Çакăн пек чухне кăна çемье çирĕп пулать. Пĕрне-пĕри каçарма пĕлсен, кÿрентермесен мăшăрсем чăннипех те вĕри юрату авăрĕнче теме пулать. Мĕншĕн тесен юратусăр пурнăç вăл – кичем те тĕксĕм. Çемье çавăрнă чухне пĕрлешекен çамрăксем ĕмĕр-ĕмĕр юратса пĕрле пурăнма тупа туса сăмах параççĕ.Прашкушкăнь ялĕнче пурăнакан Удивановсем чун-чĕререн пĕр-пĕрне юратса çур ĕмĕр ытла ĕнтĕ пĕрле пурăнаççĕ. Пĕлтĕр кăна вĕсем ылтăн туй кĕрлеттернĕ. Мăшăрсем иккĕшĕ тăватă ача çуратса пурнăç çулĕ çине тăратнă.
1955 çулта Геннадий Удивановăн салтак ячĕ тухать. Çар хыççăн вăл тÿрех колхозра ĕçлеме пуçланă. Ир пуçласа каçччен тăван колхоз уй-хирĕсенче тăрăшнă. Лашапа та суха тунă, кайран тырă та турттарнă кил хуçи. Ĕмĕрĕпех колхозра тимленĕ.
– Колхозра ырми-канми ĕçлеттĕмĕр. Канма вăхăчĕ те пулман. Халĕ уйсенче çум-курăк çеç алхасса ларать. Çитменнине тата пĕтĕм вăй-халтан çĕкленĕ хуçалăх çурчĕ-кĕлечĕсене аркатаççĕ, – хурланнине пĕлтерчĕ Г.Удиванов.
Салтак хыççăнхи çулсенче Етĕрне районĕнчи Тинкеш ялне шофер пулса ĕçлеме каять. Хăйĕн пулас мăшăрне те çав тăрăхранах суйласа илет. Выльăх тухтăрĕнче ĕçлекен Аннăпа 1960-мĕш çулта пĕр çемье çавăраççĕ.
Анна Гавриловна чĕр чунсене питĕ хытă юратнăран ветеринара Патăрьелти сельхоз шкулне вĕренме кĕрет. Çавăнтан пуçланса каять те вара унăн выльăхсене сыватас ĕç. Вăтăр пилĕк çул ветеринарта тимленĕ. Вăл вăхăтра Выл Пасар ялĕнче те, колхозра та ĕçленĕ хăйĕн юратнă ĕçĕпе.
Çичĕ çул каялла Удивановсем çĕнĕ пÿрт купаласа лартнă. Йĕри-тавра пĕтĕм хуралтăсене çĕнетнĕ.
Ачисем паянхи куна хуласене саланнă. Ывăлĕ Толя кăна тăван ялта хăйĕн çемйипе тĕпленнĕ.
Ачасене автобуспа 25 çул ĕнтĕ шкула турттарать. Тольăн мăшăрĕ вара Шĕмшешри лавккара сутуçăра тăрăшать. Çамрăк çемье ĕçе кăмăллать. Çавăнпа та килĕнче çĕр çинче ĕçлеме пĕтĕм техника пур.
Удивановсем ачисемшĕн савăнаççĕ. Вĕсем тĕрĕс çул çине тухса пурнăç çулĕпе такăр утма пĕлнишĕн хĕпĕртеççĕ. Ватăсене мăнукĕсемпе кĕçĕн мăнукĕсем час-часах килсе савăнтараççĕ.
А.СИЛИВЕСТРОВА.