20 июля 2011 г.
Тăван шкулпа тĕрлĕ çулсенче сывпуллашнисем тĕл пулусем ирттерни çĕнĕлĕх мар ĕнтĕ. Анчах та пĕр-пĕрне курса калаçни лайăхах. Çак кунсенче Элĕкри вăтам шкулта пулнă тĕл пулу, ыттисемпе танлаштарсан, чылай урăхларах. Шăп хĕрĕх пилĕк çул каялла шкул пĕтернисем пухăннă унта. Çав 1966 çулта пĕр харăсах ултă класс – вун пĕрмĕшсем тата вуннăмĕшсем виçшер класс анлă çул çине тухнă.
Çавăн чухнехи яшсемпе хĕрсем пĕр-пĕринпе уйрăмах туслă, чун-чĕреллĕ пулни палăрать. Мĕншĕн тесен вĕсем кашни пилĕк çултах юратнă шкулне пухăннă. Ку хутĕнче те йышлăн килсе çитнĕ – хĕрĕх-алă çын таранах.
Нумай çул каяллахи черченкĕ туйăмлă çамрăксен мăнаçланмалăх пулнă ĕнтĕ. Çапах та илемлипех курăнчĕç-ха вĕсем. Хушăри ырă туйăмĕсене те сыхласа хăварнă. Хăшĕ-пĕри пĕр-пĕрне сăнаса, асăрхаса, юратса пурăннине систеренçи турĕç.
Йĕркелÿ комитечĕ ятарласа хатĕрленнĕрен мероприяти питех те интереслĕ те хаваслă иртрĕ. Малтанах тăван шкулпа хавхаланса паллашрĕç. Ку енĕпе пухăннисене шкул директорĕн вĕрентÿ енĕпе ĕçлекен çумĕ Станислав Куликов каласа панине итлеме питех те кăмăллă пулчĕ. Ĕнерхи вĕренекенсемпе вĕрентекенсем вĕсен тăван шкулĕ яланхиллех районта кăна мар, республика шайĕнче те малтисен ретĕнче пулнине пĕлчĕç. Элĕк Енри ватă шкул кăçал – 147 çул тултарать иккен. Ку таранччен унтан яшсемпе хĕрсем 13 пин таранах вĕренсе тухнă.
Сцена çине Çулавăç хĕрĕ Раиса Казакова, Эренар каччи Валерий Владимиров тухсан акт залĕнче хăнасене савăнăç туйăмĕ çупăрларĕ. Вĕсем тата ыттисем ертсе пынипе «ачасем» урокра ларчĕç, юратнă шкул, вĕрентекенĕсем пирки интервью ыйтăвĕсем çине те хуравларĕç. Вуннăмĕшсемпе вун пĕрмĕшсем конкурсра тупăшни вара кашнинех чăн-чăн шкул пурнăçне илсе çитерчĕ.
Юрă-кĕвĕ чылайччен янăрарĕ. Шкулăн хальхи, ĕнерхи вĕрентекенĕсен, хăнасен саламĕсем тĕл пулăва уйрăмах илем кÿчĕç.
Пысăк йышри Элĕк Енĕн хăш-пĕр маттур çыннисене асăнмасăр епле иртĕн. Кунта вĕсем вуншаррăн. Павлушкăнь хĕрĕ Ольга Николаева – наука кандидачĕ. Ярушка хĕрĕ Елена Данилова врач-акушерта, Куракăш яшĕсем Геннадий Лукин ветеринари врачĕнче, Вячеслав Александров, Юлия Игнатьева (Кураккасси) зоотехникра, Эренарти Валерий Владимиров çар çыннинче, Павлушкăньре çуралса ÿснĕ Валериан Николаев районти яваплă ĕçсенче вăй хунă. Банк тытăмĕнче Римма Игнатьевăпа Римма Евдокимова тăрăшнă. Кусем – Кураккасси хĕрĕсем. Урмайри Алексей Викторов вара вăрман «улпучĕ». Раиса Кротова директор пулнă. Хăшĕ-пĕрисем паян та стройрах. Йăлкăш шкулĕн директорĕ Алексей Степанов, «Строймонтажри» ăста специалист-инженер Анатолий Гордеев та пултаруллисен йышĕнче.
Хĕрĕх пилĕк çул каялла шкул пĕтернисемпе пĕрле юратнă вĕрентекенĕсем те пулни пушшех те килĕшÿллĕ. Кусем – Валентина Михайлова, Клавдия Степанова, Нина Аполосова, Вениамин Золотов.
«Малашне кашни çулах тĕл пулар», – тесе уйрăлчĕç пĕрле вĕреннисем.
Е.САВЕЛЬЕВА.