20 июля 2011 г.
Кармал Тени ялĕнчи Альбина Николаева ача чухнех тĕрлеме юратнă. Амăшĕ вĕрентнĕ ăна ку ăсталăха.
Сакăр класс пĕтернĕ хыççăн хĕр пĕрчи тĕп хулана çул тытнă. Малтанхи ĕç укçине унта ĕçлесе илнĕ. Пушă вăхăтра вара яланах алла йĕппе çип тытнă, пусма çине эрешсем тунă. Пиччен енĕ-и, тÿнтер-и – пĕр пекех хитрен курăнаççĕ унăн тĕррисем.
Альбина Лаврентьевна чечексем эрешлеме питĕ юратать. Кусем вара вутăн-хĕмĕн ялкăшаççĕ, чун-чĕрене тыткăнлаççĕ. Чечексемпе пĕрлех чĕр чунсене те чăн чĕрĕ пекех тĕрлет вăл. Капăр ĕçĕсене арчара е шифоньерта усрамасть. Кусем куç умĕнчех. Рамкăласа стена çине вырнаçтарнăскерсем пÿрт ăшчиккине илемлĕх, асамлăх та кÿреççĕ. Пĕр пÿлĕмрен теприне кайнă çĕрте те – илĕртÿллĕ карăсем.
Альбина Николаевăн ырă йăла пур. Пĕр ывăнмасăр, йăлăхмасăр ларать вăл тĕрлесе. Çамрăк чухне кăна мар, халĕ тивĕçлĕ канура та алла йĕппе хитре çипсем тытать. Унăн хĕрĕсем Майăпа Эмма та тĕрĕпе аппаланма юратаççĕ.
Альбина Лаврентьевна хăйĕн илемлĕ япалисемпе тĕрлĕ куравсене хутшăнать. Вăл нумаях пулмасть-ха районти Акатуйра пĕрремĕш вырăна тухнăччĕ.
Унăн мăшăрĕ Анатолий Николаевич та илеме кăмăллать. Вăл пахчара чечексем çитĕнтерет. Урам енчи картарине те пăхсах тăрать. Картишĕнче те – клумбăсем. Вĕсенче тĕрлĕ-тĕрлĕ чечексем ешереççĕ. Элĕкри подстанцире нумай çул ĕçленĕскер ватлăх çулĕсенче чечексенче киленÿ тупнине, паллах, ырламалла кăна.
Николаевсем кил ăшшине чăннипех те шанчăклă упраççĕ.
– Вăй-хал пур чухне «Прогресс» хуçалăхра тăрăшсах ĕçлерĕм. Техник-осеменатор шанăçне те тÿрре кăларсах пытăм, – иртнине ума кăларчĕ утмăлтан иртнĕ хĕрарăм.
С.СЕРОВА.