23 июля 2011 г.
Умра – кивĕ сăн ÿкерчĕк. 1971 çултах кун çути курнă пулин те сăнне питех улăштарман-ха вăл. Аслăрах çулхисем кунти çынсене тÿрех палласа илчĕç те пулĕ. Вĕсем пирки вара сăмах пуçарма сăлтавĕ те пур. Мĕншĕн тесен çак йыш вăй хунă районти «Сельхозтехника» пĕрлешĕвĕн Анатри Кивĕ (ячĕ çапла пулнă унăн) мастерскойĕнче.
Иртнĕ ĕмĕрĕн 60-70-мĕш çулĕсенче кирпĕчрен купаланă кивĕрех курăнакан вăрăм çуртра ĕç шавĕ чарăнма та пĕлмен. Мĕншĕн тетĕр-и; Гусеницăллă тракторсене юсанă кунта. Каярах комбайнсене ĕçе хатĕрлессипе те вăй хунă. Çавăн пекех мастерскойĕнче топливо аппаратурине, радиаторсене те маçтăрланă. Ахальтен мар ĕнтĕ токарь, сварщик, слесарь, тимĕрçĕ цехĕсем кĕрлесе кăна тăнă. Вĕсене шăпах сăн ÿкерчĕкрисем – опытлă çынсем ĕçлеттернĕ.
Вырăс Сурăм çынни Николай Соснин (хыçалти ретри сылтăмран иккĕмĕшĕ) мастерской заведующийĕн шанăçне тÿрре кăларса пынă. Лăпкăн курăнакан арçын юсавçăсенчен çирĕп ыйтнă. Çав хушăрах пулăшма, хавхалантарма та пĕлнĕ. Мастерскойĕнчи ĕç хăвăртлăхĕпе пахалăхĕ Зоя Тимофеева (варринчи) хĕр-учетчицăн çаврăнăçулăхĕнчен те нумай килнĕ.
Уйăх вĕçленсен ăмăрту кăтартăвĕсене пĕтĕмлетнĕ, нумай чухне задание чылай ирттерсе пурнăçлани палăрнă. Çĕнтерÿçĕсене яланах парнепе хавхалантарнă.
Яков Миронов, Петр Антонов, Александр Тимофеев, Генсур Мурманцев (малти ретре) сменăри заданисене чыслăн пурнăçласа пынă.
– Коллективра пурте тăрăшулăх кăтартатчĕç. Петр Антонов слесарь топливо аппаратурине тăвассипе маçтăрччĕ. Генсур Мурманцев радиатрсене шăратса çыпăçтарассипе ырă тĕслĕх кăтартатчĕ. Вăл, Шураç çынни, автомашинăпа та нумай çул ĕçлерĕ, – иртнине аса илсе каласа пачĕ районта нумай çул тĕп инженер пулнă Николай Архипов.
Петр Антонов (Карачура тăрăхĕнчен), слесарь тивĕçне нумай çул тÿрĕ кăмăлпа пурнăçласа, çĕр-шыв наградине те тивĕçнĕ. Мăн Йăлкăшри Алексей Степанов (иккĕмĕш ретре сулахайри) тимĕрçĕ ĕçне парăнтарсах пынă. Кивĕ мастерскойра ĕçлесе опыт пухнăскер, тăван «Дружба» хуçалăхра мĕн тивĕçлĕ канăва кайичченех тимленĕ. Элĕкри Михаилпа Юрий пĕртăван Андреевсем те «Сельхозтехника» ĕçне тÿпе хывнă. Шураç ялĕнчи Алексей Порфирьев (хыçалти ретре сылтăмри) хастар газосварщик пулнипе палăрать. Производство участокĕнчи тирпейлĕхпе йĕркелĕхе вара Клавдия Свешникова (чи варринчи) тытса тăнă.
Анатри Кивĕ мастерскойри ĕçченсем Тури Çĕнĕ (ятне çапла панăччĕ) мастерскоя куçсан та хастарлăха чакарман. «Беларусь» тракторсене юсассипе специализациленнĕ мастерской республика шайĕнче пĕлтерĕшлĕ производство участокĕччĕ. Кунта Чăваш Енĕн пур кĕтесĕнчен те килсех тăнă. Элĕкри юсавçăсем çулталăкра 300 «хурçă ут» таран «чун кĕртнĕ».
С.ИВАНОВА.