23 июля 2011 г.
– Раиса, эсĕ ветеринара вĕреннине пĕлетпĕр. Пирĕн «Выла» хуçалăхра шăпах выльăх тухтăрĕ кирлĕ. Эпир сана ĕçе илесшĕн, килĕшмĕн-ши; – тенĕ ертÿçĕ нумаях пулмасть Яккушкăнь ялне качча килнĕ çамрăк хĕрарăма.
– Шанатăр пулсан эпĕ хирĕç мар, – пулнă хуравĕ.
Чăнах та, тепĕр куннех Вылпасар фермине çитет Раиса Куртовская. 1986 çулхи апрелĕн 1-мĕшĕ уншăн яланлăхах асра юлать. Пуçласа ĕçе тытăннине епле манăн-ха; Вăрнар районĕнчи Чăрăш Шĕнер ялĕнче çуралса ÿснĕскер совхоз-техникума хĕрлĕ дипломпа пĕтернĕ.
Элĕк Енри Яккушкăнь каччи Василий Куртовский, юнашар факультетра агронома вĕреннĕскер, ăслă-тăнлă та хитре хĕре хăйĕнчен вĕçертмен. 1984 çулхи хура кĕркунне туй кĕрлеттерсех пĕрлешнĕ çамрăксем.
Пысăк пĕлÿллĕ специалист çине – пирвайхи çулсенчех пысăк шанăç. Фермăсенчи 2 пин пуç выльăх сывлăхне пăхса тăма тивнĕ. Йĕри-таврари çичĕ ял çыннисен выльăхĕсемшĕн те ветеринари фельдшерĕ çине яваплăх тиеннĕ. Раиса Владимировна ертсе пынипе пур тĕрлĕ профилактика ĕçĕсене вăхăтра туса ирттернĕ. Выльăхсем чирлесси чакнă. Вăл Мăн Ямашра вун икĕ çул вăй хунă тапхăрта та хастарлăхне чакарман. Хăйĕн пĕлĕвне, квалификацине ÿстерсех пынă. Раиса Куртовская ĕçленĕ вăхăтрах куçăмсăр майпа аслă шкулта вĕренет, 2008 çулта ветеринари врачĕн дипломне илет.
Вăл 2005 çултанпа – Шĕмшеш ял тăрăхĕн специалисчĕ. Профилактика енĕпе ĕçлесе пырать.
– Йывăр çемьесене куçран вĕçертместпĕр. Шел пулин те ун пеккисем пирĕн тăрăхра вун пĕр таранах. Профилактика канашĕн ларăвĕсенче вĕсемпе уйрăммăн калаçатпăр. Сывă пурнăç йĕркине пăхăнса пурăнма асăрхаттаратпăр, – тет Р.Куртовская.
Вăл обществăлла ĕçсенчен те аякра тăмасть. Сăмахран, çырава хутшăнса активлăх кăтартнă. Выльăх-чĕрлĕх чирлет-и, ĕне йывăр пăрулать-и – тÿрех ун патне пырать ял-йыш.
Мăшăрĕ, Василий Денисович, пĕчĕк бизнес енĕпе пуçарулăх кăтартать, халăха валли кирлĕ япаласем ăсталать. Сăмахран, вăл явнă вĕрене пурте хаваспах туянаççĕ.
Улмуççинчен улми аякка ÿкменни паллă. Куртовскийсен ачисем те пурнăçăн тĕрĕс çулĕ çине тăрса пыни куçкĕрет. Асли, Алеша, çемье çавăрнă та ĕнтĕ, Чулхулара ĕçлесе пурăнать. Иккĕмĕшĕ, Люда, аслă шкул пĕтернĕскер, воспитательницăра ĕçлет. Кĕçĕнни, Оля, виççĕмĕш курс студенчĕ. Мăшăрсем килте иккĕшех. Кулленхи ĕçĕсенче вăй хунипе пĕрлех килти хушма хуçалăхне те аталантарсах пыраççĕ.
Е. САВЕЛЬЕВА.