27 июля 2011 г.
Аслă çул хĕррипе косилка çакнă «Беларусь» трактор пырать. Ахалех иртмест-ха вăл, кирлĕ ĕçре агрегат. Ун хыççăн курăк тип-тикĕс касăлса юлать. Çавна механизаторĕ сăнасах пырать. Кабинăран ансах хăйĕн ĕçне тишкерчĕ Владислав Филиппов.
– Ĕç-хĕл йĕркеллех пырать. Косилка аван ĕçлет, çул хĕрри те тасалсах пырать, – терĕ вăл ĕç пахалăхĕ япăх маррине палăртса.
Пĕчĕк Йăлкăш ялĕнчи Владислав Филиппов «Алиководорстрой» обществăра вăй хурать. Хĕл кунĕсенче аслă çулсене юртан тасатассипе тăрăшса ĕçленĕ пулсан халĕ çулсен хĕррисенчи курăксене çулать. Çавна май механизатор «хурçă утпа» кулленех «çулçÿреве» тухать. Питĕшкасси ял тăрăхĕнчи çулсем çинче тăрăшатчĕ Владислав Аркадьевич.
Ăна ача чухнех чун туртнă професси суйласа илесси шухăшлаттарнă. Элĕкри вăтам шкулта пĕлÿ илнĕ чухне ĕç урокĕсенче трактор вĕрентме пуçласан çамрăкăн шухăшĕ уçăмланнă. «Эпĕ тракторист, çĕр çынни пулатăп», – тенĕ вăл. Çапла ял пурнăçĕнче паллă вырăн йышăнакан техникăна интересленсех вĕренет Славка, виççĕмĕш класлă тракторист-машинист правине те илет.
Пĕчĕк Йăлкăш каччине тракториста кăна-и – водителе те вĕренме тÿр килет. Çĕмĕрлери ДОСААФ (халĕ РОСТО) çумĕнчи шоферсен курсне ăнăçлă пĕтерет. Кунта пĕлÿ илнине вара çарта çирĕплетме пуçлать. Оренбург хулинче службăра тăнă чухне хăватлă «Урал» машинăпа кĕрлеттерсе çÿренĕ Славка. Кунти вĕрентÿ центрĕ валли тĕрлĕ хатĕрсем турттарнă.
Владислав Филиппов салтакран таврăнсан Йăлкăшри машина-трактор паркĕнче ĕçлеме пуçлать. «Беларусь» трактор шанса параççĕ. Пропашной культурăсем, кукуруза, кăшман пăхса ÿстернĕ çĕрте агротехникăна пăхăнса ĕçлет. Кÿршĕри Виталий Трифонов тыр-пул пухса кĕртнĕ тапхăрта пĕрле ĕçлеме сĕнсен те хирĕçлемен çамрăк механизатор. Çапла иккĕшĕ вырмара темиçе çул та пĕрле тимленĕ.
«Дружба» хуçалăх, «Аликовский» совхоз ĕçĕсене чăннипех те пысăк тÿпе хывать Владислав Аркадьевич. Ял хуçалăх культурисене пăхса ÿстернĕ çĕре хастар хутшăннăскере час-часах фермăра ĕçлеме чĕнсе илнĕ.
Тăван хуçалăхĕ юхăнса аркансан çывăхрах ĕç шырама пикеннĕ В.Филиппов. Йăлкăшри машина-трактор паркне утма пăрахнă хыççăнах Вăрнарти çул-йĕр управленийĕн Элĕкри филиалĕнче вăй хума пуçланă. Ку организаци те ун чухне «ури çинче» çирĕпех тăман-ха, хупăнса та ларнă. Çавна май, Владислав Аркадьевичăн «Алиководорстрой» обществăна куçма тивнĕ. Халĕ вăл кунта тăрăшуллисен йышĕнче.
Унăн мăшăрĕ Людмила Ильинична Вăрнарти совхоз-техникумра вĕренсе ветеринари фельдшерĕн профессине илнĕскер, нумай çул хуçалăхри, уйрăм çынсен выльăх-чĕрлĕхне сиплесе сыватассипе тăрăшса ĕçленĕ. Юлашки вăхăтра Элĕкри улма-çырла комбинатĕнче тимлет.
Филипповсен ывăлĕ Алеша професси илнĕ хыççăн ĕçе кÿлĕннĕ. Эльвирăпа Вероника хĕрĕсем вара студентсем.
Елена ТИМОФЕЕВА.