27 июля 2011 г.
Çăл алтмалли вырăна çуркуннех палăртма пулать. Юр пĕр пек вырăнтах, анчах питĕ ир ирĕлни кунта шыв çулĕ çиелте пулнине пĕлтерет. Калăпăр, шăрăх нумай вăхăт тăнă чухне пĕр-пĕр вырăнта курăк сĕтеклĕ, симĕс, çăра ÿсни, çав вырăнта шыв çиелте пулнине çирĕплетет. Шывлă мар çĕртех хăяхпа хăмăш ÿсни те çав вырăнта шыв çулĕ çиелте пулни пирки калать. Çут çанталăка сăнама хăнăхнă çын вăрăм тунасем ăçта йышлă пулнине те асăрхама пултарать. Вĕсем шăпах шыв нумай пулакан вырăна пухăнаççĕ. Çуллахи вăхăтра, хĕвел аннă хыççăн, çак кăпшанкăсем пĕр-пĕр çĕрте йышлăн пухăнни кунта шыв çулĕ çывăхра пулнине çирĕплетет.