27 июля 2011 г.
Вĕрентекене вĕренекенĕсем пурнăçра çитĕнÿсем туни, тăван çĕршыва юрăхлă пулни яланах савăнтарать. Федор Иванов манран пĕр пÿрт урлă кăна пурăнатчĕ. Хăйĕн лайăх енĕсемпе çеç палăрса тăратчĕ вăл.Федя çичĕ çул тултарсан Ассакассинчи вăтам шкула вĕренме пычĕ. Маттур ача лайăх паллăсемпе кăна вĕренетчĕ. Спортпа питĕ туслăччĕ. Футбол вăййипе вара шкул чысне сахал мар хÿтĕленĕ, «Кожаный мяч» парнине пĕрре кăна мар çĕнсе илнĕ.
1976 çулта Федя шкула лайăх паллăсемпе пĕтерет. Çав çулах Çĕнĕ Шупашкарти 4-мĕш номерлĕ строительствăпа монтаж трестне ĕçлеме вырнаçать.
1977 çулта Федьăна çар ретне илеççĕ. Ăна авиаспециалистсен авиаци шкулне яраççĕ. Федя çавна та лайăх паллăсемпе кăна пĕтерет. Куншăн ăна киле отпуска яраççĕ. Федьăна служба тивĕçĕ Липецкри авиаци центрне, истребительсемпе бомбардировщиксен полкне илсе çитерет. Кунта вăл радиомеханик тата электромеханик пулать. Çĕршывра çĕнĕрен палăрнă çар самолечĕсене малтан çак центра илсе пынă, вĕсене пур енлĕ тĕрĕсленĕ. Çавăнпа та кунта пĕрремĕш класлă çар летчикĕсем çеç ĕçлеççĕ, званипе те майортан çÿлеллисем кăна. Авиаци полкĕ пархатарлă ĕçсем нумай тăвать, çавна май полка «отличный полк» ятне параççĕ. Хăйĕн ĕçĕсене тÿрĕ кăмăлпа туса пынăшăн Федьăна каллех киле отпуска яраççĕ. Ăна темиçе хутчен те наградăсем парса чыслаççĕ. Унăн кăкăрне «Авиаспециалист 1 класса», «Отличник ВВС» знаксем илемлетеççĕ. Вăл темиçе хутчен те парашютпа сикет, «Отличник-парашютист» знака илме тивĕçлĕ пулать. Федор Ивановăн ятне полкăн Мухтав кĕнекине кĕртеççĕ. Унăн сăн ÿкерчĕкне Хисеп Хăми çине вырнаçтараççĕ.
Çартан килсен Федя каллех Çĕнĕ Шупашкарти пÿрт-çурт тăвакан комбинатра ĕçлет, ăна звеньевой, бригадир должноçĕсене шанса параççĕ. Лайăх ĕçленĕшĕн каллех заводăн Хисеп хăми çине кĕртеççĕ, икĕ хутчен хула канашĕн депутатне суйлаççĕ. Комбинат Мускаври предприятисемпе договорпа ĕçлет. Çавна май Федя халĕ Мускавра бригадирта тăрăшать. Вăл çемьеллĕ, арăмĕпе пĕрле икĕ хĕрне аслă пĕлÿ панă, унăн виçĕ мăнук ÿснĕ. Яла канма килсен Федя вĕсене уçă сывлăшра тĕрлĕрен спорт вăййисене выляттарать.
Анатолий
ТИМОФЕЕВ,
Ассакасси сали.