30 июля 2011 г.
Икĕ хутлă та пысăк çурт çул хĕрринчех вырнаçнă. Сăмах Карачура шкулĕ пирки пырать. Ун çумĕнче «Березка» ача сачĕ ĕçлет.
Карачура шкулне Мăн Кăканар, Пĕчĕк Кăканар, Тури Карачура, Анатри Карачура, Ассакасси ялĕсенчи ачасем пĕлÿ илме çÿреççĕ. Вĕрентÿ учрежденийĕ пĕр харăсах воспитанипе вĕрентÿ ĕçне пурнăçласа пырать. Шкулта ачасене валли ятарлă компьютер класĕ пур. Унта ачасем урокра çеç мар, пушă вăхăтра та пĕлĕвне ÿстерме пултараççĕ.
Ачасен сывлăхĕ çине те пысăк тимлĕх уйăраççĕ карачурасем. 2003 çулта шкулта фельдшерпа акушер пункчĕ уçнă. Ачасен кирек хăш вăхăтра та кунта килсе сывлăхĕсене тĕрĕслеме май пур. Çавăн пекех Карачура шкулĕнче вĕренекенсем спортпа туслă. Çулсеренех кросс, йĕлтĕрпе чупасси, футбол, волейбол, шашка-шахмат вăййисем иртеççĕ. Шкул та ачасене çĕнĕ йĕлтĕрсемпе, мечĕксемпе тивĕçтерсе тăрать.
Ачасен тавра курăмне ÿстерес, ĕçе хăнăхтарас, тĕрĕс воспитани парас енĕпе те тăрăшаççĕ Карачура шкулĕнчи вĕрентекенсем. Шкулта пурĕ 3 кружок ĕçлет. Унта ачасене темĕн тума та хăнăхтараççĕ. Сăмахран, информатика предметне кăмăллакансене ытларах «Информатика» кружок илĕртет. Шахмат, шашка вăййисене кăмăллакансене вара тепĕр кружок илĕртет. С.В.Михайлов ертсе пынипе ачасем шкулти, районти меропрятисене тăтăшах хутшăнаççĕ. Спортпа туслашни сывлăхшăн усăллă пулнине те аванах чухлаççĕ вĕренекенсем.
Уйăхсерен класс сехечĕсене, ашшĕ-амăшĕсен пухăвĕсене ирттереççĕ. Ачасемпе пĕрле вĕренекенсем те районти тата республикăра иртекен мероприятисене хутшăнаççĕ. Вĕрентекенсем ачасене тĕрĕс воспитани парас, пурнăçăн анлă çулĕ çине тăратас тесе ырми-канми ĕçлеççĕ.
Карачура шкулĕнче ăс пухакансем те, вĕрентекенсем те вĕренÿпе пĕрле пушă вăхăта саплаштарма пĕлеççĕ.
В. НИКИФОРОВА.