03 августа 2011 г.
«Кашни çыннăн хăйĕн Турă пур», – теççĕ. Пирĕншĕн, мăшăрпа иксĕмĕршĕн, Ураскилтри пĕтĕмĕшле практика врачĕн офисĕнчи Римма Александровна Малинова Турă вырăннех пулчĕ.Шупашкартан килнĕ хĕрĕм офиса шăнкăравласа пулăшу ыйтсан Римма Малинова врачпа Светлана Васильева сестра часах çитрĕç. Вĕсем сывлăха тĕрĕслерĕç, эмел пачĕç, укол турĕç. Çавăн хыççăн хамăра лайăхрах туйма пуçларăмăр. Система мелĕпе вунă кун сипленнĕ хыççăн чир иртсе кайрĕ пекех туйăнчĕ.
Ураскилтри офисра ырă кăмăллă та чун-чĕреллĕ çынсем ĕçлеççĕ. Вĕсем чирлĕ çынна сăмахсемпе те сиплеççĕ. Валентина Пузырниковăна та асăнмасăр иртеймĕн. Вăл та çын нушине ăнланни куçкĕрет.
Сывлăх ĕçченĕсем пулăшнипех вăй-хал илтĕмĕр. Утă типĕтсе кĕртессипе те ĕçлеме пултартăмăр. Тухтăрсен ырă сĕнĕвĕпе канашĕ те усăллă пулчĕ пирĕншĕн.
Йывăр вăхăтра юрату пулăшнине те туйса илтĕм. Хăй чирлĕ пулин те мăшăрăм мана пăхсах тăчĕ. Эпĕ вара ăна малтанхинчен те ытларах кăмăллама пуçларăм. Çав ырă туйăм та пулăшрĕ ĕнтĕ чире çĕнтерме.
Ливерий ФЕДОРОВ.