03 августа 2011 г.
Район администрацийĕн граждансен тытăмĕн акчĕсене çыракан пая (ЗАГСа) хам çăмăлпа – аттен ятне, хăçан çуралнине тата мăн пичин пепкин çуралнă кунне пĕлме, халăх йышлă ан пултăр тесе, кăнтăр апачĕ иртнĕ хыççăн çитрĕм. Пÿлĕмре ертсе пыракан специалист В.Трофимова, хутсене йĕркелесе лараканскер, чăрмантарнăшăн кăштах та кăмăлне пăсмасăр, ăшшăн кĕтсе илчĕ. Ыйтăва тимлĕн итлерĕ. Ку вăхăтра хам паллакан арçынах кĕчĕ. Унăн хăйĕн ыйтăвĕ. Тепĕртакранах пĕр мăшăр, çавăнтах тепри кĕчĕç. Кашнинех ăшшăн сăмахласа йышăнать Валентина Васильевна. Вĕсене калаçăва хутшăнса тимлĕн итлет. Ĕçе мĕнле-мĕнле тумаллине, ытти кантурсене çитсе килмеллине, кирлĕ хутсем тутармаллине калать.
Пĕр мăшăр хут уйăрттарасшăн. Вĕсене ыйтăва çырма пулăшать, арçыннине тепĕр кантура çитсе килмеллине ăнлантарать. Лешĕ таврăнсан ăшшăн калаçкаласах хутсене йĕркелет специалист.
Иккĕмĕш мăшăрăн ача çуралнă. Вĕсемпе те тĕплĕн сăмахлать, документсене хатĕрлет, хăйсен тата ăçта мĕн-мĕн тумаллине ăнлантарать.
Тепĕр иккĕн те кĕрсе тухрĕç пÿлĕме. Вĕсен ыйтăвне те татса пачĕ ĕçчен. Иккĕн вăй хураççĕ район администрацийĕн ЗАГС пайĕнче – М.М.Николаева ертÿçĕ, В.В.Трофимова специалист.
Шкафсенче ял тăрăхĕсем, чиркÿ прихучĕсем тăрăх çырса пынă хулăн кĕнекесем йĕркипех. Манăн ыйтăва та пĕтĕмĕшпе тивĕçтерчĕ специалист – кирлĕ актсене тупрĕ.
Н.ЛАРИОНОВ.