06 августа 2011 г.
Анчахрах Шупашкарта Пĕтĕм Раççейри инвалидсен обществин (ВОИ) пиллĕкмĕш отчетпа суйлав конференцийĕ иртнĕ. Унăн ĕçне çак обществăлла пĕрлешÿн пирĕн районти организацийĕн ертÿçи Геннадий Деомидов та хутшăннă. Иртнĕ кунсенче Элĕкре ВОИн районти организацийĕн правлени ларăвĕ иртрĕ. Унта Пĕтĕм Раççейри инвалидсен обществин Чăваш Республикинчи организацийĕн анчахрах ĕçленĕ конференцийĕ тата умри тĕллевсем çинчен сăмах пычĕ.
Çакна каламалла: Раççейре саккунсем, право йĕркисем пĕрмаях улшăнса тăраççĕ. Вĕсене хăш чухне тĕрĕс ăнланса пĕтерме те çук. Уйрăмах çакă хавшак та сусăр çынсене хытă пырса тивет. Ара, хевтесĕр çынсем пур çĕре те тухса çÿреймеççĕ вĕт, ыттисемпе тан хутшăнмаççĕ вĕсем общество пурнăçне те, хăйсене кирлĕ информацие тата ытти хыпарсене те туллин илсе тăраймаççĕ. Шăпах çак ыйтусем çинче чарăнса тăчĕ район прокурорĕн çумĕ А.Архипов. Александр Алексеевич саккунсемпе, право йĕркисемпе туллин паллаштарчĕ, пухăннисен ыйтăвĕсене тĕплĕн хуравларĕ.
ВОИн районти организацийĕн ертÿçи Г.Деомидов инвалидсен обществин Чăваш Енри пĕрлешĕвĕн 5-мĕш отчетпа суйлав конференцийĕ мĕнле ĕçлени çинчен каласа пачĕ.
Инвалидсен обществин политикăри витĕмĕ самаях пысăккине ВОИн Чăваш Енри организацийĕн ертÿçине Маргарита Кузминыха ЧР Общество палатин членне суйлани те, вăл Чăваш Ен Президент Канашĕн членĕ пулни те лайăх çирĕплетет. Маргарита Павловна ВОИн Элĕкри организацийĕ республикăра малтисен ретĕнче пулнине палăртрĕ.
Президиум ларăвĕнче инвалидсен обществин Элĕкри уйрăмĕн çывăх вăхăтри тĕллевĕсене палăртрĕç.
В.ПАВЛОВ.