06 августа 2011 г.
Эпир, тăватă хĕрача, ăмăртмалла тенĕ пек çитĕнтĕмĕр. Пурнăçне те хамăрăнах тытмалла пулчĕ. Ман çине вара йывăрлăхĕ ытларах лекрĕ. Аппа, йăмăксем те шкул пĕтерсе, професси илсе ирĕкке кайса вырнаçрĕç. Эпĕ вара вĕсемшĕн ашшĕпе амăшĕ вырăнĕнчехчĕ. Професси илес тесе хам та тимлерĕм. Вăрнарти профессипе техника училищинче сад ăстине вĕрентĕм. Хыççăн хамăр «Авангард» хуçалăхрах ĕç вырăнĕ тупрăм. Колхоз садĕнче ятарлă звено вăй хуратчĕ. Эпир унта тĕрлĕрен улма-çырла, пахчаçимĕç ÿстернĕ. Тупăш илессипе районта та палăраттăмăр. Çав садра вун çичĕ çул тăрăшса ĕçлесе çĕр-шыв наградине тивĕçрĕм. Уй-хир бригадинче те тăрăшсах ĕçлерĕм. Пÿрни-çырни тупăнсан хамăр ялти Веньăна качча тухрăм. Вăл та садра вăй хуратчĕ, хыççăн – электрикра. Кайăк-кĕшĕк фабрики уçăлсан унăн ĕçне кÿлĕнтĕм. Хавхалансах тимлеттĕм, анчах та пĕр кунхине инкеке çаклантăм. Çав кунхине йĕри-таврара çил-тăман çавăрттаратчĕ. Витен пысăк алăкĕ вăйлă çиле пула хăвăрт шаплатса хупăнчĕ. Çавна май сасартăк çĕр çине тĕшĕрĕлсе антăм. Сылтăм ура питĕ хытă ыратса кайнине туйса илтĕм. Çапла вăйлах сусăрлантăм. Уксах пулса юлтăм.
Ĕçшĕн кăна пурăннă эпĕ. Урана сиплессишĕн пачах та тăрăшман. Ватăлса пынă май, суран татах та йывăрланчĕ. Çапах та инвалида та тухассишĕн тимлемерĕм, çăмăллăхпа усă кураймастăп.
Инкек пĕччен çÿремест тени тĕрĕсех. Кĕçĕн ывăл та сасартăк сусăр çын пулса тăчĕ. Вăл пĕрремĕш ушкăн инваличĕ. Малтанах тĕрĕс-тĕкел те сывахчĕ-ха. Вăйăран вăкăр пулать тесе ахальтен каламан. Çиччĕмĕш класс ачи çÿллĕ çурт тăрринчен сасартăк ÿкнипе пулчĕ инкек. Виталий сусăррипех вăтам шкул пĕтерчĕ, професси те илчĕ. Анчах ĕçлеме тÿр килмерĕ ăна.
Мăшăрăм час-часах пуç ыратнипе аптăрать. Хăлхи питех илтмест, куçĕ те япăх курать.
Çăмăл мар пулин те яра куна кăштăртататпăр.
Е.КУДРЯВЦЕВА,
Тури Карачура ялĕ.