06 августа 2011 г.
Мĕн патне каятпăр, мĕн патне утатпăр – пĕлместпĕр: çурт-йĕре пăсас текенсем кашни утăмрах халь, çĕнĕрен тăвас шутлисем темшĕн-çке пит курăнсах каймаççĕ. Салатма талăк та çитет, тенĕ ваттисем. Тĕрĕсех те пулĕ. Халĕ акă Татмăш фермине куллен аркатаççĕ. Стенасене пăсса автомашинăпа ют çĕре илсе каяççĕ. Çирĕм-вăтăр çул каялла вара кунта ферма ĕçченĕсем выльăх-чĕрлĕхрен продукци нумайрах илессишĕн тăрăшнă, патшалăха сĕтпе аш-какай сутмалли плансене тултарса пынă. Акă, сăмахран, 1993 çулта Татмăшри сĕт-çу комплексĕнче 250 ĕне пулнă. Сĕт сăвассипе районта малтисен йышĕнче пынă. Çав çулхине патшалăха сĕт 662 тонна сутнă. Пĕр сăмахпа каласан, ферма ĕçченĕсем ÿсĕм хыççăн ÿсĕм тунă. Шел пулин те, халĕ темиçе çул каялла выльăх-чĕрлĕх патĕнче ĕçленĕ çынсен ырă самантсене аса илмелли çеç юлать. Ферма пулнă çурта пăсни вара кашнин чунне ыраттарать пулĕ. Анчах аркатма чараймăн, мĕншĕн тесен конкурс управляющийĕ çурта «ютрисене» сутнă. Вĕсем хальхи вăхăтра тимĕр-бетон конструкцийĕсене пăсаççĕ те тиесе каяççĕ. Хуть мĕн калăр та, салатасси вăл çĕнĕрен тăвасси мар.
К.ЮРЬЕВ.