10 августа 2011 г.
Хальхи вăхăтра ял хуçалăхĕнчи ĕç-хĕле йĕркелесе пыма пачах та çăмăл мар. Аякран пулăшу кĕтсе илеймĕн. Ытларах харпăр хăйшĕн тăрăшасси малти вырăна тухрĕ. Пĕлетпĕр ĕнтĕ, чылайăшĕ пысăк укçа шыраса аякка тухса каять. Вырăнта вара ĕç вăйĕ çитмест. Епле пулсан та хуçалăхри ĕç-хĕле йĕркелесе, тытса пымаллах. Ульянов ячĕллĕ хуçалăхра «симĕс ĕççи» калăпăшĕ пĕчĕкех пулмарĕ. Хуçалăхра сенажпа силоса пурĕ пин тонна хатĕрлесе çитернĕ. Ял хуçалăх култьтурисене вăхăтра акса-лартса хăвартăмăр. Халĕ уй-хир ешерет. Пысăк тухăçшăн кĕрешÿ пырать. Пĕчĕк йышпах пысăк ĕçсем тăватпăр. Эдуард Андачков çанталăкăн кашни вăхăчĕпе пĕлсе усă курчĕ. Вырма тапхăрĕ пуçланиччен обществăлла выльăх-чĕрлĕхе хĕл каçарма сенаж хатĕрлессипе тимлерĕ, вырнă çĕрте тăрăшрĕ.
Олег Порфирьевпа Станислав Порфирьев симĕс апата турттарчĕç. Траншейăсем ешĕл курăк массипе тулса ларчĕç. Выльăхсене хĕл каçарма утă та çителĕклĕ хатĕрлерĕмĕр. Пурĕ 400 тонна пухса тирпейлерĕмĕр.
Ульянов ячĕллĕ хуçалăхра выльăх-чĕрлĕхе хĕл каçарма хатĕрлессипе ырми-канми тăрăшаççĕ. Хальхи вăхăтра выльăхсене пуян рационпа тăрантаратпăр. Ешĕл апат сĕт хушнине тĕпе хуратпăр. Ăнăçлăхĕ выльăх пăхакансенчен те нумай килет. Ĕне сăвакансем куллен 1000 тонна сĕт суса илеççĕ. Çитес çул мĕнле тухăç илесси ăна кăçал епле ирттернинчен нумай килет. Усă курман çĕрсене пусă çаврăнăшне кĕртесси те тĕп тĕллевсенчен пĕри пулса тăрать.
Çакна та палăртмалла. Ĕçченсем хăйсен тивĕçне пĕлсе пурнăçлаççĕ. Япăх мар шалу илни те вĕсене кулленхи ĕçре хавхалантарса тăрать.
С.ПОРФИРЬЕВА,
хуçалăх ертÿçи.