10 августа 2011 г.
Тури Карачура ялĕнчи илемлĕ кил-çуртран хĕрарăм тухрĕ. – Ĕç вырăнĕ манăн çывăхрах. Урам урлă каçатăп та шкула çитетĕп. Эпĕ кунти тасалăхпа тирпейлĕхшĕн яваплă, – терĕ Зинаида Терентьева.
Пур юлташĕсем отпускра пулнă пулсан, Зина вара шкултан татăлман.
– Каникул вăхăчĕ пулин те вĕрентекенсем, ачасем те килсех тăчĕç. Çĕнĕ вĕренÿ çулне хатĕрленессипе ĕçсем хĕрсех пычĕç. Классене тирпей-илем кÿрессипе ĕçлерĕмĕр. Урайсене сăрларăмăр. Ачасем практикăна çÿрерĕç. Пахча-çимĕçсен йăранĕсене çум курăкран тасатсах тăчĕç, шăварчĕç, – хыпарларĕ вăл ĕçĕ-хĕлĕ пирки.
Зинаида Ильинична çамрăк чухне ку тăрăха лекесси пирки шухăшлама та пултарйаман. Йĕпреç районĕнчи ялта çуралса ÿснĕскер Шупашкарти заводра ĕçлеме тытăннă. Сахал-и тĕп хулара яшсем; Çавсенчен пĕри – Элĕк енри Вадим Терентьев пĕрре курнипех килĕштернĕ Зинăна. Часах пĕрлешеççĕ çамрăксем. Çĕнĕ пурнăçа чĕртме вара яла таврăнаççĕ вĕсем. Иккĕшĕ те ĕçе кÿлĕнеççĕ. Çамрăк кил хуçине Вадима автомашина шанса панă. Ăна чылай çул пĕр тикĕс ĕçлеттерет. Зина шкулта вăй хума тытăннăранпа вун тăватă çул та çитнĕ. Вăл «Авангард» хуçалăх ĕçне хутшăнни çинчен те хыпарларĕ. Кăшман анинче кăçал та тимлесех вăй хунă, ултă рете çум курăксенчен тасатнă.
Ÿркенмен мăшăр килти хуçалăха та тирпейлĕ тытать. Хушма хуçалăхне выльăх-чĕрлĕх йышлă усраса вăйлатса пыраççĕ. Терентьевсен ачисем те савăнмалăх пур. Валера, Саша ывăлĕсене авлантарнă вĕсем, пĕчĕкçĕ мăнукĕ пурришĕн хĕпĕртеççĕ. Кĕçĕн хĕрĕ Вероника пĕлĕвне техникумра ÿстерет, строитель пулма ĕмĕтленет.
Пĕр-пĕрне килĕштерекен Терентьевсем хăйсен шăпипе кăмăллă. Пурăнма пĕлекенсем чăннипех те телейлĕ çав.
Е.ИВАНОВА.
Сăн ÿкерчĕкре:
З. Терентьева.