10 августа 2011 г.
Район прокуратуринче çул çитменнисем, çемьене, амăшĕсемпе ашшĕсене тата ачалăха сыхласси çинчен законодательствăна епле пурнăçланине пăхса тăрасси – ĕçри тĕп çул-йĕрсенчен пĕри. Амăшĕсемпе ачасене хÿтĕлессипе саккуна епле пăхăннипе интересленсе, суд приставĕсен Элĕкри уйрăмĕнчи алимент шыраса илмелли ĕç хучĕсене тишкертĕмĕр.
РФ Çемье кодексĕн 80-мĕш статйипе килĕшÿллĕн ашшĕ-амăшĕн çула çитмен ачисене пăхмалла. Чылай парăмçăсем çавна тĕпе хумаççĕ-ха. Хăш-пĕрисен парăмĕ алимент тÿлессипе 200-300 пин тенкĕрен те иртнĕ. Кăçалхи июлĕн 1-мĕшĕ тĕлне илсен, ачисен умĕнчи тивĕçе маннисем пирки пуçарнă ĕçсем суд приставĕсен уйрăмĕнче 91 таранах пулни курăнчĕ.
Çемье кодексĕн 115-мĕш статйин 2-мĕш пункчĕпе килĕшÿллĕн айăплă çын алимент илекене срокран ирттернĕ кашни куншăн парăмăн пĕрре вуннăмĕш проценчĕ чухлĕ неустойка (штраф) тÿлет. Алимент парăмĕ пысăкланни ыттисен айăпĕпе, сăмахран, тÿлекене ĕç укçине вăхăтра паманнипе те çыхăннă. Ку таранччен район территорийĕнче вăхăтра тÿлемен алиментран неустойка шыраса илмелли правăпа усă курман.
РФ ГПК-ан 45-мĕш статйин 1-мĕш пайĕпе килĕшÿллĕн район прокуратури кăçалхи çур çулта 11 ĕç хучĕ тăрăх неустойка шыраса илме район судне заявленипе тухрĕ.
А.БОЛЬШОВА,
район прокурорне пулăшакан.