13 августа 2011 г.
Кашни çын çакă çутă тĕнчене мĕнле те пулин ят хăварма килет. Пирĕн ĕçтешĕмĕр, акăлчан чĕлхине вĕрентекен Ираида Валерьяновна Иванова ырăпа кăна палăрать тесшĕн эпир. Вăл вăтăр çул ытла Тавăт ялĕнчи пысăк шкулта çанă тавăрса ĕçлет. Хăй те çавăнтах вĕреннĕ, кайран Элĕкри вăтам шкула пĕтерсе Шупашкарти пединститутри ют чĕлхесен факультетĕнче пĕлÿ илсе каллех Тавăт шкулне таврăннă. Кунта вăл организатор та, директорăн çумĕ те, ертÿçĕре те ĕçлесе пысăк опыт пухрĕ. Халĕ вăл учительте ĕçлесе ачасене акăлчан чĕлхине юратма, калаçма вĕрентет. Çак чĕлхен уйрăмлăхĕсемпе илемлĕхне туйма, акăлчан халăхĕн культурипе йăли-йĕркине, вăрттăнлăхĕсене алла илме пулăшать. Çавăнпа пĕрлех ачасене урокра, килте, клубра, çынсемпе мĕнле пулмалли çинчен тăтăшах асăрхаттарса нумай ĕçсем тăвать. Ачасене вăл концертсене хутшăнтарса акăлчан чĕлхипе юрăсем, сăвăсем калаттарать. Унăн вĕренекенĕсем акăлчанла наукăпа практика конференцийĕсенче калаçса, тĕрлĕ темăсене çутатса парса тĕлĕнтереççĕ. Унран ырри мĕн пултăр! Çакă ĕнтĕ вăл ырă ят.
Çак кунсенче пирĕн ĕçтешĕмĕрĕн юбилей. Пурнăçăн анлă çулне утса тухма ăна юман пек çирĕп сывлăх, пархатарлă кун-çул, çăл куç пек тапакан вăй-хал сунатпăр. Ачусен, мăнуксен ырлăхне курса савăнмалла пултăр, юратнă Ираида Валерьяновна. Эсир пирĕнпе юнашар пулни – пысăк телей.
Зоя КУЛИКОВА тата районти ют чĕлхесене вĕрентекенсем.