17 августа 2011 г.
Эпир, вăрçă ачисем, пурăнатпăр-ха. Пĕчĕк чухне, ытлăх-çитлĕхне курман пулин те, вылямасăр, кулмасăр ÿсмен. Симĕс курăклă урамра çара уран чупаттăмăр. Аннемĕрсем пире хăйсенчен питех уйрăман. Уй-хире çум çумлама, утă пуçтарма, тырă вырма илсе каятчĕç. Хĕртсе пăхакан хĕвел питтинче ĕçлесе пайтах тар юхтарнă эпир. Çапах та шăрăх тесе çăвар уçман. «Анне, манăн хырăм выçрĕ» тесе те ачашланман.
Илер-ха, сăмахран, Георгий Судакова. Ача чухнех тĕслĕхчĕ вăл пирĕншĕн. Шкулта тăрăшса вĕренетчĕ, обществăлла ĕçсенче хастарччĕ. Ÿссе çитĕнсен тăван çĕр-шыв умĕнчи тивĕçе те чыслăн пурнăçларĕ вăл. Салтак тивĕçне чун-чĕререн парăнса, вăрçă вут-çулăмĕ витĕр те тухма пултарчĕ. Мирлĕ ĕçре те пĕрремĕшĕ пулчĕ Георгий Федорович. «Молния» колхоза нумай çул пултаруллăн ертсе пычĕ. Ун чухне çĕр ĕçченĕсем, выльăх-чĕрлĕх пăхакансем район шайĕнче ырăпа палăратчĕç.
Паян та стройрах ĕçпе вăрçă ветеранĕ. Çулĕсем самаях пулин те пурнăçпа киленме пĕлет вăл. Ял-йыша ырă сĕнÿ-канаш парса пулăшать, хавхалантарать те.
Иван Григорьева та ырăпа кăна асăнас килет. Сăпайлă яшчĕ. Чăн-чăн зоотехник пулнипе палăрчĕ хамăр тăрăхра. Вăл пултарулăх кăтартнипе фермăсенче çирĕп йĕрке тунăччĕ. Выльăх-чĕрлĕх пăхакансемпе пĕр чĕлхе тупса ĕçлеме пултарчĕ.
Иван Иванович часах авланмарĕ. Самаях çуллансан хăйне килĕшÿллĕ мăшăр тупма пултарчĕ. Римма савнă çыннипе ытлă-çитлĕ пурнăç турĕç, ачисене те тÿрĕ çул çине кăларчĕç.
Савăнатăп ентешĕмĕрсемшĕн. Вĕсем халĕ те стройра пулни кăмăла çĕклет. Чăннипех те ырă тĕслĕх вĕсем ыттисемшĕн. Калаçма кăна-и, юрлама, ташлама, шÿтлеме те пултарнипе килĕшÿллĕ вĕсем.
Л.ФЕДОРОВ,
Ураскилт ялĕ.