17 августа 2011 г.
Тăвăш Юнтапа ялĕнчи Анатолий Тимофеевăн пултарулăхĕ ача чухнех çăл куç пекех тапса тăнă. Вăл Ассакасси шкулне Мухтав хучĕпе пĕтернĕ. Пĕлĕвне Вырăс Сурăм шкулĕнче ÿстернĕ хыççăн Чăваш патшалăх педагогика институчĕн физикăпа математика факультечĕн студенчĕ пулса тăнă. Аслă пĕлÿллĕ каччă – Совет Çарĕн салтакĕ. Çирĕп сывлăхлăскер Красноярск хулинчи авиаци шкулĕнче вĕренме тивĕçет.
Анатолий Ленинград çар округĕнчи Пушкин хулинчи реактивлă бомбардировщиксен полкне лекет. Чăваш каччи бомбардировщикăн радист-стрелокĕ пулать. Анатолий вĕçев вăхăтĕнче темиçе хутчен те парашютпа сикет. Полк командирĕ унран офицер тăвасшăн пулнă. Çар училищинче аслă сержант экзаменсене лайăх тытать. Ăна чăваш пулнине пĕлсен тĕлĕннĕ те. Мĕншĕн тесен Анатолий Тимофеев вырăсла лайăх пĕлнĕ, пĕлĕвĕ çирĕп пулнине те кăтартнă.Вăл каярах кĕçĕн лейтенант званине илет.
Анатолий Тимофеевич 1958 çулта çартан таврăнать. Вăл ачасене 38 çул физикăна вĕрентнĕ. Халĕ, тивĕçлĕ канура пулин те, районти ветерансен организацине пултаруллăн ертсе пырать.
Владимир ЕГОРОВ,
обществăлла корреспондент.