20 августа 2011 г.
Пысăк ялсен шутĕнче мар Кайри Хирлеп. Çынсен йышĕ те сахал кунта. Ытларах тивĕçлĕ канурисем пурăнаççĕ район центрĕнчен аякра вырнаçнă ялта. Ача-пăча сасси те илтĕнсех каймасть, туй арăмĕсем те тахçанах илемлĕ юрă-такмак шăрантарман. Ялта ĕç çукран вăйпитти арçынсемпе яшсем ют хуласемпе облаçсене ĕçлеме çÿреççĕ, теприсем В.Узянов хресчен-фермер патĕнче тăрăшаççĕ. Ял асамлă вырăнта вырнаçнă тейĕн. Ял вĕçĕнчи пысăк та капмар йăмрасем хăйсем патне туртнăнах туйăнать. Уйрăмах шăрăх çанталăкра йывăçсем айĕнче ларса канма питех те лайăх. Кил карти умĕнче арçынпа хĕрарăм шăкăл-шăкăл калаçса ĕçлеççĕ. Паллашрăмăр – Игнатьевсем кусем. Арăмĕпе упăшки канмалли кунсенче яла килнĕ иккен. Хăйсем тĕп хулара тĕпленнĕ.
– Тăван кĕтес хăй патнех чĕнет. Чунăмпа яланах çак килте. Эпĕ кунта çуралса ÿснĕ, – калаçăва пуçларĕ Анатолий Владимирович.
Игнатьевсем йышлă çемьере çитĕннĕ. Анатолий пĕртăвансенчен кĕçĕнни пулнă май тĕп килтех юлнă. Салтак тивĕçне пурнăçланă яш медицина енĕпе вĕренме кайнă. Хыççăн тăван яла таврăнма шут тытнă. Кунта ăна кĕтнĕ тейĕн. Çамрăка валли тÿрех ĕç вырăнĕ те тупăннă. А.Игнатьев Тенири фельдшер пунктне ĕçлеме вырнаçнă, Элĕкри тĕп больницăра тăрăшнă.
– Мăшăрăмпа район больницинче паллашнă. Хам та, медицина енĕпе пĕлÿ илнĕскер унта ĕçлеттĕм. Туслăх майĕпен юратăва куçрĕ. Пĕрлешме шут тытрăмăр, – çамрăклăха аса илчĕ Анастасия.
Игнатьевсем пĕр ывăла пурнăç парнеленĕ. Тольăпа Настя малтанах Кайри Хирлеп ялĕнчех пурăннă, кулленех Элĕке ĕçе çÿренĕ. Пĕчĕк ывăлне Вовăна Настьăн асламăшĕ пăхнă. Выльăх-чĕрлĕхне те йышлă тытнă вĕсем. Çулсеренех икшер пуç ĕне, сурăхсем, сыснасем усранă. Выльăх-чĕрлĕх тытса тупăшне те илме тăрăшнă.
– Пилĕк çул ялта пурăннă хыççăн Шупашкарта хваттер туянтăмăр. Мăшăрăмпа тата ывăлпа тĕп хулана пурăнма куçрăмăр, – терĕ А.Игнатьев.
Игнатьевсем ялти тĕп киле пăрахмаççĕ. Кашни канмалли кунах Кайри Хирлепе килсе кил-çуртне пăхса тăраççĕ, хуралтисене çĕнетеççĕ. Çуллахи вăхăтра вара Тольăпа Настя анкартинчен кĕме те пĕлмеççĕ. Тĕрлĕ пахча-çимĕç лартса ÿстереççĕ. Сăмах май каласан, Толя купăспа ăста вылять. Мăшăрĕ вара юрра-ташша маçтăр. Игнатьевсен ывăлĕ Мускав хулинче шалти ĕçсен пайĕн ĕçченĕ пулма вĕренет. Толя массажист та. Ют хуласемпе облаçсене ĕçлеме çÿрет, çынсене чир-чĕртен сыватать. Настя вара нумай çул шăл тухтăрĕнче тăрăшнă хыççăн шалти ĕçсен пайĕнче вăй хурать. Килти ăнăçлăх, ĕçри çитĕнÿсем çемьери лару-тăруран нумай килеççĕ. Мăшăрсем хушшинче килĕшÿ пулсан çеç йывăрлăхсене çăмăллăн çĕнтерме пулать. Çакна тĕпе хурса пурăнаççĕ те Игнатьевсем.
М.РОЗОВА.